"Qarabağ"ın yarımmüdafiəçisi Con Delarj "Keşlə" ilə Topaz Premyer Liqasının VII turundan təxirə salınmış oyunundan sonra brifinq keçirib. Matç.az saytının məlumatına görə, konqolu futbolçu jurnalistlərə müsahibəsində bərabərliyi (1:1) dəyərləndirib.

- "Neftçi" ilə oyunda əsas heyətdə idiniz, bu gün isə ehtiyatdan meydana daxil oldunuz. Bu, ötən görüşü yaxşı keçirməməyinizlə bağlı idi?

- Bu, məşqçinin qərarıdı. Biz həm Avropa Liqasında, həm də çempionatda oynayırıq. üç gündən bir oyuna çıxırıq. Buna görə də yorğunluq olur. Baş məşqçimiz də rotasiyalar edir və çalışır ki, bütün oyunçulara vaxt versin. 25 oyunçumuz var və yalnız 11-i əsas heyətdə oynaya bilər. Məşqçi məni keçən matçda əsas heyətdə oynatmışdı, bu dəfə isə sonradan meydana daxil oldum. Bu, sadəcə, rotasiya və matçın sistemi ilə bağlı idi.

- "Vorskla" ilə qarşıdakı oyun haqda nə deyə bilərsiniz?

- Əvvəlcə çempionatdakı növbəti görüşümüz haqda düşünürük. Həftəsonu öz meydanımızda 3 xal qazanmaq istəyirik. "Neftçi" ilə aramızda 5 xallıq fərq var və çalışacağıq ki, xal itkisinə yol verməyək. Daha sonra "Vorskla" ilə qarşılaşma barədə düşünəcəyik.

- Avropa Liqasında qrupdan çıxmaq şanslarınızın qalmadığını söyləmək olar?

- Bizim 3 oyunumuz qalıb. Həmin 3 görüşdə 9 xal toplaya bilərik. Riyazi olaraq şanslarımız davam edir.

- çempionluq şanslarınız barədə nə deyə düşünürsünüz?

- Hazırda oktyabr ayıdı və çempionat mayda başa çatır. Ona görə də indidən nəsə demək çətindi. Ola bilər ki, biz bu ay yaxşı performans göstərmədik. Amma növbəti ay hər şey dəyişə bilər.

XƏBƏRİ PAYLAŞ
  • gplus
  • pinterest