"Neftçi"nin kapitanı Emin Mahmudov Azərbaycan kubokunun 1/4 finalında "Sumqayıt"la 0:0 hesablı heç-heçə etdikləri matçdan sonra jurnalistlərin suallarını cavablandırıb.

- Nə üçün bu gün yarımfinala vəsiqə qazana bilmədiniz?

- Məncə, birinci oyun daha yaxşı oynaya bilərdik. Ancaq evdə 1:0 uduzmağımız bu qarşılaşmada bizə problem yaratdı. Mütləq qol vurmaq lazım idi. Onlara əks-hücum etməyə imkan verməməyə çalışdıq. Bilirdik ki, rəqib yaxşı əks-hücum edir və irəlidə təhlükəli vəziyyət yaradacaqlar. Bizim də epizodlarımız var idi, amma yararlana bilmədik.

- Sizcə  "Sumqayıt"ın qapıçısı Mehdi Cənnətov qol vurmağa mane oldu, yoxsa "Neftçi"nin futbolçuları dəqiq oynaya bilmədilər?

- Hər iki görüşdə Mehdi Cənnətov çox yaxşı oynadı. O, bizə qarşı həmişə yaxşı çıxış edir. Komandamız da həmçinin sonluğu yaxşı qoya bilmirdi. Son ötürmə, son zərbədə dəqiqlik olmurdu.

- "Neftçi" ardıcıl iki ildi  "Sumqayıt" səddinə ilişir. çempionatda çox asanlıqla qalib gəlməyinizə baxmayaraq, nə üçün kubokda bu komandaya qalib gələ bilmirsiniz?

- "Sumqayıt" bizə qarşı bütün oyunlarda yaxşı çıxış  edir. Premyer Liqadakı ən yaxşı komandalardan biridi. çox yaxşı əks-hücum yaratmağı bacarırlar.

- Demək olar ki, rəqib "Neftçi"yə qarşı tam başqa  motivasiya ilə oynayır?

- Fikrimcə, bütün komandalar bizdən xal almaq istəyir.

- "Neftçi"nin kubokda olmamağını uğursuzluq hesab etmək olar?

- Əlbəttə ki, bu, bizim üçün böyük uğursuzluqdu. Qələbə qazanmaq üçün oynayırdıq. Təəssüf ki, alınmadı.

- Hakim sizə sarı vərəqə göstərdi. Amma uduzan da siz idiniz, tələsən tərəf də. Sarı vərəqə nəyə görə verildi?

- Əvəzetmə zamanı yeni qaydalarda meydanı ən yaxın olan nöqtədən tərk etmək lazımdı. Ancaq mən kapitan olduğum üçün sarğını kiməsə verib, çıxmalıyam. Ya Mehdi Cənnətova verməli idim, ya da özümdə qalmalı idi, çıxanda başqa adama verməli idim (gülür). Mən hakimin bu hərəkətini başa düşmədim.

- Artıq ilk  dövrə başa çatdı. Dövrəni "Neftçi" üçün necə dəyərləndirirsiniz? çempionluq mübarizəsində "Neftçi" istəyinə çata biləcək?

- Kuboka görə ili yaxşı adlandırmaq olmaz. çempionatda deyə bilmərik ki, işimiz bitib. Amma başlanğıcda çox pis başlamışdıq. Normal vəziyyətdə oynadıq. Lakin  yenə də ilk pilləyə qalxmaq üçün 6 xal lazımdı.

- ötən mövsüm "Qarabağ" "Neftçi"dən geri olsa da, onu qabaqlayaraq, çempion ola bildi. Bu mövsüm isə siz 6 xal geridəsiniz. Necə düşünürsünüz, "Neftçi" də bunu təkrarlaya biləcək?

- Ən böyük problem oyunlarda qələbə qazanmaqdı. "Qarabağ" keçən mövsüm göstərdi ki, bunu edə bilər. İndi də hər şey bizdən asılıdı. Biz də bir neçə oyunda qələbə qazanıb, bunu edə bilərik.

- Yurçeviç sizi milliyə dəvət etsə də, əsas heyətdə yer vermirdi. Məşqçinin gedişinə sevindiniz? Yeni gələcək mütəxəssisin sizə ədalətli davranacağını düşünürsünüz?

- Oyundan sonra ancaq bütün fikrim bu matçı niyə  uduzmuşuq deyə analiz etməkdə olacaq. Ancaq bu barədə düşünəcəyəm. Belə oyundan sonra istirahət etmək də çətindi. Əhval-ruhiyyə də korlandı.