"Sevinirik ki, qalib gəldik. Əsas məqsədimiz topa daha çox nəzarət etməkdən ibarət idi. çalışırdıq ki, hesabı qoruyaq və gücümüzü son oyuna saxlayaq. Diqqətimiz həm də Malta - Kosovo matçına yönəlmişdi. Lakin Kosovo qalib gəldi".

Matç.az xəbər verir ki, bunu Azərbaycan yığmasının futbolçusu Araz Abdullayev evdə Farer adalarını 2:0 hesabı ilə yendikləri UEFA Millətlər Liqasının V tur matçından sonra jurnalistlərə açıqlamasında deyib.

26 yaşlı yarımmüdafiəçi bildirib ki, noyabrın 20-də səfərdə Kosovo ilə keçirəcəkləri son qarşılaşma finala bərabər olacaq. Abdullayev yüksək motivasiya və konsentrasiya olmalarının gərəkliyini vurğulayıb: "Yenə birgə mübarizə apararaq, bu işin də öhdəsindən gəlməliyik. Deməzdim ki, əhvalımız yoxdur. Sadəcə, qarşıda Kosovo ilə oyun var. Maksimum çalışırıq ki, son matçımıza motivasiya və konsenrtasiya olaq. Cəmi 3 gün vaxtımız qalıb".

Təcrübəli futbolçu oyunun sonlarında ayağındakı ağrılara baxmayaraq, hazırda özünü yaxşı hiss etdiyini diqqətə çatdırıb.

Qeyd edək ki, Araz Abdullayev Farer adaları ilə görüşdə sonadək meydanda olub.