"Hər dəfə hansısa komandada baş məşqçi istefaya göndəriləndə, mənim adım hallanır". Matc.az xəbər verir ki, bunu veteran futbolçu Tərlan Əhmədov deyib.

Bir müddət əvvəl 50 yaşlı mütəxəssisin işsiz günlərinin başa çatacağı, yenidən Premyer Liqaya qayıdacağı iddia olunurdu. Onun "Səbail" və "Sumqayıt" klubunun baş məşqçisi postuna gətiriləcəyi gözlənilsə də, bunlar baş vermədi. T.Əhmədovun sözlərinə görə, mətbuat həmişə boş qalan yerə onun namizəd olduğunu yazsa da, indiyədək hansısa komandadan rəsmi təklif almayıb: "Haqqımda yayılan xəbərləri mətbuatdan oxuyuram. Bu səbəbdən deyəcəyim nəsə yoxdur".

Tanınmış çalışdırıcı artıq bir ildən artıqdır işsiz qalmasına baxmayaraq, ölkə futbolunu yaxından izləyir. Klubların qış təlim-məşq toplanışı barədə danışan T.Əhmədovun fikrincə, bütün komandaların çempionatın ikinci yarısına yaxşı hazırlaşması üçün xaricdə toplanış keçməsi, sınaq görüşlərində iştirak etməsi vacibdir: "çempionatda mübarizə aparan 8 komandadan altısı Antalyadadır. Görünən odur ki, bütün klubların sabit maliyyəyə malik olduğunu demək olmur. Klubların yaxşı hazırlıq keçməsi üçün xaricdə toplanış keçməsi çox vacibdir. Mən belə bir aqibəti yaşamışam. Əksər komandalarımız xaricdə toplanışda olanda, baş məşqçisi olduğum AZAL komandası Bakıda hazırlıq keçirdi. ümumilikdə, 8 komandadan altısının Türkiyədə, ikisinin ölkə daxilində hazırlıq keçməsi xoş görüntü deyil. Klubların başı həm hazırlığa, həm transferlərə qarışıb. Vaxt gündən günə azalır. Onların oyunlarını da izləyirik. Düzdür, yoxlama görüşlərində qeydə alınan nəticə o qədər də vacib deyil. Klubların necə hazırlıq keçdiyi, hansı səviyyədə olduqları çempionatda görünəcək. Məsələn, klublar Antalyada, biz Bakıda hazırlaşanda rəhbərlik etdiyim AZAL komandasının mükafatçılar arasına düşməyə real şansı var idi. Yəni, kənardan baxanda başqa cür görünür. Ola bilsin ki, Bakıda hazırlıq keçən "Səbail" və "Keşlə" fasilədən sonra daha baxımlı oyun göstərdi, daha çox xal topladı. ümumilikdə isə bütün klublarımız Antalya toplanışına yollansa idi, daha maraqlı olardı".

Əksər mütəxəssislər çempionluq uğrunda mübarizənin "Neftçi" və "Qarabağ" arasında olacağını düşünür. Buna səbəb isə bu komandalar arasında 11 xallıq fərqin olmasıdır. Əhmədov necə düşünür, "Neftçi" fasilədən sonra 11 xallıq fərqi aradan qaldıra, "Qarabağ"a çata biləcəkmi?  "Qızıl medallar uğrunda mübarizənin yalnız "Neftçi" və "Qarabağ" arasında olacağını deməzdim. "Qəbələ"ni bu siyahıdan silmək olmaz. Bu komandanın rəhbərliyinə, baş məşqçisi Elmar Baxşıyev və futbolçulara təşəkkür düşür. Eləcə də, Rəşad Sadıqovun rəhbərlik etdiyi "Zirə" komandası. "Sabah"ı da yaddan çıxartmayaq. Son oyunlarda potensialını göstərib. Yeni baş məşqçiləri var, komandaya yeni futbolçular cəlb olunur. "Neftçi" və "Qarabağ"a gəlincə, düzdür, 11 xallıq fərq az deyil. Fikrimcə, çempionluq uğrunda mübarizə 2 deyil, 4 komanda arasında gedəcək. Qış fasiləsindən sonra daha maraqlı, daha gərgin çempionat izləyəcəyik. "Qarabağ" "Neftçi"dən 11 xal öndə olsa da, kimsə deyə bilməz ki, mütləq birinci olacaq. Amma bütün hallarda, "Neftçi"nin "Qarabağ"a çatması çətin olacaq. "Neftçi"nin hansı oyunlarda xallar itirdiyini, hansı komandanın hansı rəqiblə oyununun alınmadığını bilirik".