"İlk oyunumuzun evdə olması sevindiricidi. Çünki mərhələyə doğma azarkeşlər önündə qalibiyyətlə start vermək istəyirik. Azərbaycan millisi asan rəqib deyil. Ümumiyyətlə, müasir dövrdə asan komanda yoxdu"

Millimizin Avro-2020-nin seçmə mərhələsindəki rəqibi Xorvatiya yığmasının hücumçusu Andrey Kramariç futbolinfo.az-a müsahibə verib. Almaniyanın "Hoffenhaym" klubunun üzvü "Maksimir" stadionunda baş tutacaq ilk tur qarşılaşması haqda danışıb, millimizi dəyərləndirib.

 - Artıq bir neçə gün sonra Aç-2020-nin seçmə mərhələsi start götürəcək. İlk oyununuzu evdə Azərbaycana qarşı keçirəcəksiniz. Matça hazırsınız?

- İlk oyunumuzun evdə olması sevindiricidi. çünki mərhələyə doğma azarkeşlər önündə qalibiyyətlə start vermək istəyirik. Azərbaycan millisi asan rəqib deyil. ümumiyyətlə, müasir dövrdə asan komanda yoxdu. Bizi çətin qarşılaşma gözləyir. Dünya çempionatından sona Millətlər Liqasında oynadıq. İndi isə seçmə mərhələ başlayır və dünya çempionatında göstərdiyimiz nəticəyə görə insanlar bizdən yaxşı nəticə istəyir. Məhz bu da bizi matçlara motivasiya edəcək.  3 xalla başlamaq üçün hazırlaşmışıq. Mütləq qalib gəlməliyik.

- Baş məşqçiniz Zlatko Daliç Xorvatiya yığmasının aşkar favorit adlandırıb. Onunla razılaşırsız?

- Əlbəttə. Doğma azarkeşlər önündə oynayırıq, dünya çempionatının uğurlu komandalarından biriyik. Bu səbəbdən əlbəttə ki, favorit sayıla bilərik. Lakin heç bir rəqibi kiçiltmək lazım deyil. Evdə oynamağımıza baxmayaraq, bizi ağır matç gözləyir. Əlimizdən gələni edəcəyik ki, oyunu qalib başa vuraq, azarkeşlərimizi sevindirək.

- Qrupda hansı komanda sizinlə sona qədər mübarizə apara bilər?

- Düşünürəm ki, heç bir komanda asan rəqib deyil. Elə qrupdayıq ki, bütün komandalar mübarizə aparmaq gücündədirlər. Uels, Slovakiya kimi özünü sübut etmiş rəqiblər var. Bizə də çətin olacaq. Amma Avropa çempionatının final mərhələsində oynamaq üçün var gücümüzü ortaya qoyacağıq. Elə Azərbaycanla qarşılaşmadan başlayaraq, bütün diqqətimizi matçlara yönəltməliyik ki, uğurlu olaq.

- Xorvatiya yığması Aç-2016-nın seçmə mərhələsində Azərbaycan millisinə 6:0 hesabı ilə qalib gəlmişdi. Həmin nəticənin təkrarlanması mümkündü?

- Baxacağıq. Əslində, futbolda sadəcə, xal qazanmaq, uğurlu olmaq daha önəmlidi. çox və ya az qol vurmağın fərqi yoxdu. Lakin futbolda "ən yaxşı müdafiə hücumdu" kəlməsini unutmayaq. Biz hücum edəcəyik və nə qədər reallaşacaq, görəcəyik. Əgər mümkün olsa, təbii ki, böyük hesabla qalib gəlmək istəyərik. ümid edirəm ki, bizdə hər şey yaxşı alınacaq.

- Həmin matçda 1 qol da vurmuşduz...

- Yadımdadı. Həmin qarşılaşmada start heyətdə meydanda idim. 11-ci dəqiqədə hesabı açmışdım.

- Bakıdakı matçı xatırlayırsız?

- 0:0 hesabı ilə bitən qarşılaşma. Mən o matçda meydana çıxmadım. Komandamız xeyli qol epizodu yaratmışdı. Lakin istifadə də bilmədik.

- Yığmamızın baş məşqçisi həmyerliniz Nikola Yurçeviçdi və o, yeni təyin olunub...

- Bilirəm. Nikola Yurçeviçi isə əla tanıyıram. Uzun illər Slaven Biliçin köməkçisi olub. Düşünürəm ki, yaxşı komanda yaradacaq. Onunla şəxsi münasibətlərim də var.  Yurçeviçin uğurlu olmasına çox sevinərəm. İnanıram ki, Azərbaycan yığmasında uzun müddət işləyəcək və uğurlu olacaq.

- Şəxsi münasibətiniz var və güman ki, komandanın əsas heyətində hücum xəttində yer alacaqsan. Yurçeviçin komandasına az qol vurmağı düşünürsən? Ona hörmət əlaməti olaraq...

- Baxarıq (gülür).