"Tuninqlə bağlı problem olmuşdu. Həm də mən milli komanda ilə toplanışda olduğum vaxt qohumum maşını sürətlə idarə etmişdi və avtomobili saxlamışdılar. Həmin vaxt avtomobili mənim idarə etdiyimi deyirdilər, halbuki özüm yığma ilə birgə Avstriyada idim".

"Sumqayıt"ın futbolçusu Rail Məlikov autocity.az saytının "Onun arabası var" rubrikasına müsahibə verib. Matc.az saytı xəbər verir ki, 34 yaşlı müdafiəçi indiyədək dəyişdiyi maşınlardan, yüksək sürətlə maşın idarə etməyə meylliliyindən və "Formula-1"ə marağından danışıb...

- Maşın sürməyə neçənci ildən başlamısınız?

- 2003-cü ildən. İlk maşınım "Mercedes-Benz R129" olub. Onu Emin İmaməliyevdən almışdım. Bu, ən çox bəyəndiyim maşın idi. Həmin avtomobil çox dözümlü və rahat idi.

- Neçə il idarə etdiniz?

- Onu 4 il idarə etdim, sonra "Mercedes GL" aldım. Həmin vaxt "Neftçi"də oynayırdım və tuninq etdirib ağ-qara rəngdə etdirmişdim.

- Deyəsən, həmin maşınla bağlı nə isə problem yaşanmışdı...

- Tuninqlə bağlı problem olmuşdu. Həm də mən milli komanda ilə toplanışda olduğum vaxt qohumum maşını sürətlə idarə etmişdi və avtomobili saxlamışdılar. Həmin vaxt avtomobili mənim idarə etdiyimi deyirdilər, halbuki özüm yığma ilə birgə Avstriyada idim. Sonra isə 2011-ci ildə "Mercedes S Class" AMG 6.3 motor aldım. Bu, ən çox bəyəndiyim maşınlardan biri idi. "Lexsus 350", BMW 7-ci seriya, "Hyundai Sonata", "Subaru" və sonda BMW 5-ci seriya aldım. Bu, ən çox arzuladığım və uşaqlıqdan sevdiyim maşın olub. Bu, ilk növbədə, motorunun həcminin böyük - 4.6 olması ilə əlaqədardır. özüm zəif motorlu maşınları sürə bilmirəm. Hazırkı avtomobilim Bakıda tək-tük olan maşınlardan biridir.

- Tuninq etdirdiyiniz maşının heyvan səsli siqnal verdiyi də deyilirdi...

- Həmin maşını cərimə meydançasına aparmışdılar və orada başqa maşının siqnalını mənimki kimi göstərmişdilər. "Day-day"lardan birinin avtomobili elə siqnal verirmiş, atmışdılar mənim maşınımın üstünə. Məndə həmin maşının original siqnalı olub və onun da qiyməti 5000 manat idi. Mən elə qəribə siqnallardan istifadə etməmişəm. Bu, nə mənə, nə də maşınıma yaraşardı və ən nifrət etdiyim siqnal idi. Kimsə boynuma şər atıbsa, axırıncı adamdır, Allahdan qorxsun.

- Belə həcmli motora malik BMW ilə doğrudan da nadir hallarda rastlaşmaq olar...

- Bəli. 4.6 və 4.9 həcmli motora malik BMW-lərə M-Paket deyirlər. BMW elə maşındır ki, onu sürən ancaq elə BMW sürmək istəyir, başqa marka maşın almaq istəmir. Ona görə də 7-ci seriyalı BMW-mi satdıqdan sonra 2-3 maşın dəyişsəm də, özümü yaxşı hiss etmədim. Əvvəllər böyük həcmli motora malik maşın sürənlər sonradan kiçikhəcmliləri sürə bilmir. Ona görə də yenidən BMW-ni və uşaqlıqdan arzuladığım "39 kuzov"u götürdüm.

- Maşını sürətlə idarə etməyi sevirsinizmi və ən maksimal sürətiniz nə qədər olub?

- "Mercedes S Class" AMG 6.3 motorlu avtomobilimi 305 km/saat sürətlə sürmüşəm. Bu, gecə vaxtı idi. Hansı yolda sürdüyümü deməyəcəyəm. Həmin vaxt yola radar qoyulmamışdı. Maşınımın maksimal sürəti isə 320 km/saat idi. Elə sürətli maşın idi ki, yoxlamaq istədim. Nəyi gizlədim, sürət xəstəsiyəm. Boş tras idi, heç kim yox idi. Ərəblər bu maşını 307 km/saat sürətlə sürüblər, "YouTube"də var. Mən isə 305-lə sürdüm.

- Deyəsən, maşınlarınızı tez-tez dəyişsəniz də, nömrələrini dəyişməmisiniz...

- Demək olar ki... "MR 002" sonluğu mənim inisialımdır. MR soyadım və adımın baş hərfləri, "2" isə geyindiyim formanın nömrəsidir.  

- Radara tez-tez düşürsünüz?

- İndi nadir hallarda düşürəm. çünki riayət edirəm. Əvvəllər də riayət edirdim. Sadəcə, indi harada necə sürməyin lazım olduğunu bilirəm. Yaş istər-istəməz öz sözünü deyir. İndi daha çox parkinq olmayan yerlərdə radarlar qoyulub, onlara düşməkdən qaçmaq olmur. 18 manat da cəriməsidir. Amma yollarda radarlara nadir hallarda düşürəm.

- Borcla bağlı maşını satdığınız hal olub?

- Yox, məndə belə hal olmayıb. Əksinə, GL-i barter edəndə üzərində pul aldım.

- Axı, hazırkı maşının əvvəlki qiymətdə deyil...

- Bu, klublardakı gəlirimdən asılı məsələdir. Həm də artıq böyük və komfortlu maşınların həzzini almışam. Ən yaxşısı, səni qane edən maşının olmasıdır. Nə vacibdir ki, gözə girəsən?

- Doğrudan da vaxtikən futbolçular arasında ən bahalı maşın sizdə olub?

- "Mercedes GL" olan vaxt bəli. Ən bahalı maşın məndə idi. Amma digər futbolçularda da bahalı avtomobillər idi.

- Bakıda keçirilən "Formula-1" yarışlarını izləyirsiniz?

- Uşaqlıqda çox izləyirdim, Mixael Şumxerin "xəstəsi" idim. O gedəndən sonra çox izləmirəm, amma rəğbətim "Ferrari"yədi.

- Maşını sürətlə idarə etməyiniz bununla əlaqədardır?

- (gülür) Hər bir insan özünü sınamaq istəyir. Amma "Formula-1" maşınları fərqlidir, onları idarə etmək üçün peşəkarlıq, təcrübə lazımdır. Həm də onlar adi maşınla eyni deyillər.

- "Formula-1"ə olan marağı artırmaq üçün nə edilməlidi?

- Məncə, bu idman növü Azərbaycana yad deyil. Hər bir idman növünün öz tamaşaçıları var. Nə qədər ölkə bu yarışı keçirməyin həsrətindədir. Sevindirici haldır ki, Bakıda belə bir yarış keçirilir və insanlar gəlib baxırlar. Artıq bütün dünya bizi tanıyır. Xarici qonaqlar da gəlib Bakınə görürlər. Ən sürətli trek də bizdədir.

- Tanıdığınız "Formula-1" pilotları var?

- Niyə yoxdur? Lüis Hemilton və Sebastyan Fetteli xüsusi qeyd edərdim. Hamilton 5 dəfə dünya çempionu olub və bu titulların sayında 7 qat dünya çempionu Mixael Şumaheri keçəcəyini bildirib.

- Ağır qəza keçirmisiniz?

- Xeyr, ağır qəza keçirməmişəm. Amma mənim maşınımı vurublar. O da ciddi bir şey olmayıb.

XƏBƏRİ PAYLAŞ
  • gplus
  • pinterest