"Həm futbolçu, həm də baş məşqçi karyeramda qələbəyə inanmışam". Matc.az saytının məlumatına görə, bunu Macarıstan yığmasının baş məşqçisi Marko Rossi söyləyib.

Macarlar AVRO-2020-nin seçmə mərhələsi çərçivəsində sabah Azərbaycan millisinin qonağı olacaq. Oyunöncəsi təşkil edilən mətbuat konfransında italiyalı mütəxəssis istənilən nəticənin mümkünlüyünü vurğulayıb: "Sabah məğlub olsaq, nə havanı, nə də başqa bir şeyi bəhanə edəcəyik. Uduzsaq, səbəbini özümdə görəcəm".

- Xorvatiya üzərində qələbədən sonra favorit Macarıstandı. Bu amil sizə necə təsir edə bilər?

- Məncə, qrupda kağız üzərində hər zaman başqa şeyi göstərmək olar. Amma meydandakı mübarizədən çox şey asılıdı. Sabah da uğurlu nəticə qazanmaq istəyirik. Azərbaycan yığmasına hörmətlə yanaşırıq. Onların oyun üslubu, futbolçuları barədə məlumat toplamışıq. Azərbaycanda yerli komandaya qarşı oynamaq təkcə bizə yox, bütün rəqiblərə çətin olacaq. Biz də rəqibə yuxarıdan aşağı baxmayacağıq.

- Uğurlu startdan sonra final mərhələsinə vəsiqə qazanacağınıza inamınız artıbmı?

- 2016-cı ildəki final mərhələsində Macarıstan yığması çıxış edib. Ondan bir müddət əvvəl vəsiqə qazana bilmirdik. Budəfəki Avropa çempionatında iştirak etmək istəyirik. çünki Bakı ilə yanaşı, biz də ev sahiblərindən biriyik. Doğma azarkeşlərimiz önündə oynamaq istəyirik. Final mərhələsinə çıxa bilsək, əminəm ki, oyunlarımızda tribunalar dolu olacaq. Hazırda favorit Xorvatiyadı. Ondan sonra Uels və Slovakiya gəlir. Vəsiqə üçün isə ilk iki yeri tutmaq lazımdı. Rəqibin kimliyindən asılı olmayaraq, qələbə barədə düşünməliyik. Xorvatiya üzərində qələbə bizi ümidləndirdi. Amma sabah səhvlər etsək, Azərbaycan da bizi cəzalandıra bilər.

- Sabah Xorvatiya ilə oyundakı start heyəti meydana çıxacaq?

- Xeyr, eyni olması mümkün deyil, çünki zədəlimiz var. Ən yaxşı heyəti meydana çıxarmağa çalışacağıq. Mənim üçün hər zaman ən önəmlisi növbəti oyundu.

- Bəzi legioner futbolçularımız fərdi mükafatlara layiq görüldülər. Bu amil sizin üçün nə kəsb edir?

- Onlar üçün sevinirəm. Məşqçi heyəti seçir, komandanı hazırlayır. Amma hər şeyi meydanda futbolçular həll edir. Futbolçularımız da hazırda yüksək səviyyədədilər. önəmli olan Xorvatiya ilə görüşdən sonra oyunçularımızın yaxşı formada olmasıdı. Futbolçularımız bütün dünyada çıxış edir. Belələrinin çox olması yaxşıdı. Mənim vəzifəm onlardan ibarət güclü kollektiv formalaşdırmaqdı.

- Azərbaycanda çalışan Roberto Bordinlə danışmısınızmı?

- Bordinlə birlikdə çıxış etmişəm. Onunla söhbət etmişəm. Ancaq çox məlumat vermədi.

- Uzun müddətdi səfərdə qələbə qazana bilmirsiniz. Sabahkı görüşdə qələbə üçün nə lazımdı?

- Bunun cavabını bilsəydim, əvvəldən qələbə qazanardım. Oyunlar zamanı rəqiblər haqda çox məlumat əldə etməyə çalışıram. Evdə daha uğurlu oynayırıq. Xorvatiya ilə görüşdə emosional idik. özümüzü azarkeşlərin bir hissəsi kimi hiss edirdik.

XƏBƏRİ PAYLAŞ
  • gplus
  • pinterest