Ağdamın "Qarabağ" klubu antirekorda imza atıb. Matç.az saytı xəbər verir ki, Azərbaycan təmsilçisi ilk dəfə avrokuboklarının qrupunun ilk dövrəsini həm xalsız, həm qolsuz başa vurur.

4-cü dəfə Avropa Liqasının qrupunda çıxış edən, hesabında çempionlar Liqasının da qrupu olan Qurban Qurbanovun yetirmələri əvvəlki cəhdlərində dövrəni ən azı 1 xalla tamamlayırdı. çempionumuzun ilk üç oyunda qol vurmamasına da təsadüf olunmamışdı.

Ağdamlılar 2 dəfə dörd, 1 dəfə üç, 1 dəfə isə bir xal qazandığı dövrədə həmişə qol sevinci də yaşamışdı. Bu dəfə "Sportinq"ə 0:2, "Arsenal"a 0:3 uduzan "Qarabağ" "Vorskla" ilə görüşdə də seriyanı qıra bilməyib – 0:1.

Digər Azərbaycan klubları "Neftçi" və "Qəbələ"nin qrupdakı çıxışlarına baxsaq, ilk dövrəni belə uğursuz başa vuran olmayıb. Düzdü, "Qəbələ" ikinci cəhdində dövrəni xalsız tamamlayıb. Lakin ən azı qol sevinci yaşayan "qırmızı-qaralar"ın top fərqi də daha yaxşı olub.