"Futbolçularıma təşəkkür edirəm. Bu gün çox səbrli oynadılar və lazım olan anda hücum etdilər". Matc.az saytı xəbər verir ki, bu sözlər "Partizani"nin baş məşqçisi Franko Lerdaya məxsusdu.

çempionlar Liqasının I təsnifat mərhələsində "Qarabağ"la Tiranada qolsuz bərabərə qalan Albaniya çempionu Bakıdakı cavab qarşılaşmasında 0:2 hesabı ilə məğlub olaraq, Avropa Liqasına yuvarlanıb.

Oyunsonrası mətbuat konfransında Lerda məğlubiyyəti bu fikirlərlə əsaslandırıb: "Düşünürəm ki, baxımlı oyun göstərdik. İlk turlarda görüşdüyümüz ən çətin rəqiblərdən biri idi. "Partizani" müdafiə olunmaqdan həzz alırdı və çox sürətli əks-hücumlar edirdi. Rəqibə də uğurlar arzulayıram. Azarkeşlərimizə isə bizi dəstəklədiyi üçün təşəkkür edirəm".

- İlk oyundan sonra tənqidlər var idi ki, komanda meydanda ağır görünür. Bu gün isə futbolçular sürətli idi. Doğrudanmı, bir həftə ərzində bu qədər dəyişiklik oldu?
- Açığı, tənqid görməmişəm. Hazırlıq prosesindən sonra futbolçuların hazırlıq durumu bir-birindən fərqli olur. Bunu qəbul edirik. Digər tərəfdən bəzi oyunçular kollektivə gec qoşuldular. Fərqli hazırlıq oldu. Nə qədər məşq etsək də, oyundan-oyuna artım olur. Bir qədər səbrli olmalıyıq ki, futbolçular yaxşı formanı bərpa etsinlər.

- Son iki transferin hər ikisini növbəti mərhələ üçün sifariş edəcəksiniz?
- Məncə, bunda elə bir problem olmamalıdı.

- Bədavi Hüseynovun durumu nə yerdədi?
- Sual altındadı. Növbəti mərhələnin cavab oyununu da buraxa bilər.

- Mərkəz müdafiəçisi transferi düşünmürsünüz?
- Legionerləri də gətirib doldurmaqla deyil. Müdafiənin hər iki cinahına legioner gətirmişik. Lazım olanda Maksim Medvedevi də mərkəzə çəkəcəyik. İnşallah, bir problem olmaz.

- Növbəti rəqib "Dandalk" oldu. Bu barədə nə deyə bilərsiniz?
- Məncə, bildirmək üçün tezdi. Rəqibi daha yaxından tanıdıqdan sonra ətraflı məlumat vermək olar. Uzaq səfərə çıxacağıq. Bu da futbolçularda yorğunluq yaradacaq. Buna baxmayaraq, növbəti mərhələyə də maksimum hazır olmağa çalışacağıq.

- Qol vəziyyətlərini boşa vermək nə ilə bağlıdı?
- Rəqibin oyunçularını da nəzərə almaq lazımdı. Qol buraxmamaq üçün hər şeyi etdilər. Futbolda belə hallar olur. Bəzən 4-5 epizodu qaçıra bilirsən. Bəzən isə bir şansın olur, onda da fərqlənirsən.

- "Qarabağ" adətən təmkinli oynayır. Bu dəfə isə hücumameyilli çıxış etdiniz. Bu, oyun üslubunuzdakı dəyişikliklə bağlıdı?
- Bu gün çox topa sahib olduq. Səfərdəki matçda da rəqib zonaları boş qoymurdu. O qədər də hücumlarımız olmamışdı. Amma doğma meydanda azarkeş dəstəyi ilə futbolçular daha inamlı olur.

- Ailton Silva ilk rəsmi oyununa çıxdı. O, Geryenin boşluğunu doldura biləcəkmi?
- Normal oynadı. Ailton yaxşı formasından uzaqdı. Oyun təcrübəsi də azdı. Son rəsmi oyununu səhv etmirəmsə martda oynamışdı. Yaşı da azdı. Futbolçuları müqayisə etmək istəməzdim. Hər bir oyunçunun öz potensialı var. Ailtonda bu gün heç də pis alınmadı. Yavaş-yavaş qaydasına düşəcəyini düşünürəm.