02 Aprel 2021, 18:37

21 yaşadək futbolçulardan ibarət Azərbaycan millisinin baş məşqçisi Milan Obradoviç Dç-2022-nin seçmə mərhələsi çərçivəsində keçirilmiş Azərbaycan - Serbiya oyunundan danışıb. Matc.az xəbər verir ki, ölkəsinin mətbuatına danışan mütəxəssis bunları söyləyib:
 
"Mənim üçün Serbiya millisinin Bakıya gəlişindən yaxşı nə isə ola bilməz. Həmyerlilərimin səfəri məni sevindirdi. Lakin pandemiya səbəbindən həmyerlilərimlə demək olar, görüşə bilmədim. Oteli ziyarət etmək qadağan olunduğundan, onlarla istədiyim kimi görüşüb, söhbət edə bilmədim. Hətta bir fincan çay içmək imkanı belə, olmadı".
 
Canni De Byazinin Azərbaycanın əsas millisindəki işini də dəyərləndirən Obradoviç italiyalı mütəxəssisin yığmaya inam gətirdiyini söyləyib: "O, arxa xətdə beş müdafiəçi ilə ciddi nizam-intizam tələb edir. Mütəşəkkil, məqsədyönlü, döyüşkən kollektiv formalaşdırıb. Nəticədən asılı olmayaraq, daim şans axtarırlar. Rəqib hətta rəqib kosmosdan gəlsə belə, Azərbaycan onun üçün çox təhlükəli ola bilər. De Byazi komandaya əminlik və futbolçularda öz gücünə inam hissi gətirib".
 
44 yaşlı mütəxəssis U-21 yığmasındakı vəziyyətə də toxunub: "Pandemiya bizi ölkədə qalmağa məcbur etdi. Vəziyyət digər yığmalar üçün də yaxşı deyil. Amma mən getdiyimiz yoldan razıyam. Əsas komandanın son təlim-məşq toplanışında bir neçə gənc futbolçumuz var idi. Sayın mümkün qədər çox olmasını istəyirik".
 
Qeyd edək ki, Azərbaycan millisi Dç-2022-nin seçmə mərhələsinin 3-cü turunda evdə Serbiya yığmasına 1:2 hesabı ilə uduzub.

XƏBƏRİ PAYLAŞ
  • gplus
  • pinterest