16 Dekabr 2021, 14:23

"Adından da göründüyü kimi, Ukrayna ilə oyunlarımız yoxlama xarakteri daşıyacaq. Lakin reytinq əmsallarına xallar əlavə etmək baxımından qələbə qazanmaq lazımdır"

Bu gün KİV üçün təşkil olunan açıq məşqdən əvvəl futzal üzrə Azərbaycan millisinin kapitanı Rizvan Fərzəliyev də jurnalistlərin suallarını cavablandırıb. Matc.az xəbər verir ki, təcrübəli futzalçı hazırlıq prosesi və millimizin rəqibləri ilə bağlı bunları söyləyib:
 
"Hazırlığa dekabrın 12-dən başlamışıq. Dünən və bu gün isə gündə 2 dəfə məşq keçirik. Məşqlərdə fiziki hazırlığa yox, taktiki çalışmalara daha çox yer verilir. Əlbəttə, yoxlama oyunu olsa da, Ukrayna ilə matçlarda həm yaxşı nəticə qazanmaq, həm də səhvlərimizi, çatışmazlıqlarımızı görmək istəyirik. çünki yanvarda da toplanışımız və yoxlama oyunumuz olacaq. Həmin hazırlıq prosesində bu matçlarda ortaya çıxacaq səhvlər üzərində işləyəcəyik.
 
Adından da göründüyü kimi, Ukrayna ilə oyunlarımız yoxlama xarakteri daşıyacaq. Lakin reytinq əmsallarına xallar əlavə etmək baxımından qələbə qazanmaq lazımdır. Baş məşqçinin tapşırıqlarından da çox şey asılıdır. Elə etməliyik ki, Avropa çempionatının final mərhələsinə tam hazır yollanaq.
 
Ukrayna millisi ilə ilk dəfə 2010-cu ildə qarşılaşmışdıq. Həmin vaxt final mərhələsinin 1/4 final matçı idi. Əsas və əlavə vaxt heç-heçə başa çatdığına görə, qalib penaltilər seriyasında müəyyənləşdi. Sonrakı illərdə isə həm rəsmi oyunlarda, həm də turnirlərdə üz-üzə gəldik. ümumiləşdirsək, bizim üçün uğurlu rəqib deyil. çox qaçan komandadır. Biz isə texnikalı oyuna üstünlük veririk. Ona görə də oyun çətin keçəcək".

XƏBƏRİ PAYLAŞ
  • gplus
  • pinterest