Futbol üzrə Ukrayna millisinin baş məşqçisi Aleksandr Petrakov cərimələnib. Matc.az xəbər verir ki, bu barədə Ukrayna Futbol Assosiasiyasının prezidenti Andrey Pavelko sosial şəbəkə hesabında paylaşım edib.
 
Funksioner bildirib ki, 65 yaşlı mütəxəssis bir müddət öncə Rusiya əsgərləri ilə bağlı səsləndirdiyi fikirlərə görə kiçik məbləğdə cərimə ödəyəcək: "UEFA rusların absurd şikayətinə çoxdan baxıb. Təbii ki, diskvalifikasiya ilə bağlı heç bir qərar yoxdur və ola da bilməz".
 
Daha əvvəl Rusiya Futbol İttifaqı (RFS) Petrakovun futboldan ömürlük kənarlaşdırılması ilə bağlı Avropa futbol qurumuna müraciət edib. Buna mütəxəssisin Ukrayna ordusunun tərkibində Rusiyaya qarşı vuruşmaq arzusunda olduğunu və ən azı 2-3 əsgər öldürə biləcəyini deməsi səbəb olub.
 
Pavelkonun sözlərinə görə, Petrakovun fikirlərini müzakirə edən UEFA baş məşqçinin cərimələnməsinə qərar verib.
 
Rusiya qoşunları fevralın 24-dən Ukraynaya hücuma keçiblər. Bu hücum bütün dünyada kəskin etirazlara səbəb olub. Hücumdan sonra Rusiyaya qarşı bir çox sanksiyalar tətbiq edilməyə başlanıb. Həmçinin, Rusiyanın və onun müttəfiqi olan Belarusun müxtəlif idman növləri üzrə komandaları da qadağalarla üzləşib.

XƏBƏRİ PAYLAŞ
  • gplus
  • pinterest