“Qarabağ”ın kapitanı Maksim Medvedev “metaratings.ru” saytına müsahibə verib. Matc.az xəbər verir ki, 34 yaşlı müdafiəçi bir çox məsələyə münasibət bildirib.

- Bütün karyeranızı “Qarabağ”da keçirmisiniz və matçların sayına görə klubun rekordçusuna çevrilmisiniz. Özünüzü klubun canlı əfsanəsi hiss edirsiniz?

- Düzünü desəm, bəli. 20 ildir eyni klubda olmaqdan məmnunam. Gənclərdən ibarət komanda ilə başladım, 2006-cı ildə əsas heyətə düşmək şansı qazandım. Oyundan-oyuna gücləndim, meydanda daha çox düşündüm, futbolçu kimi böyüdüm və bu, öz bəhrəsini verdi. Sonra mənə kapitan sarğısını verdilər, təxminən 6-7 ildir məndədi. Bu da məni sevindirir, çünki “Qarabağ” hazırda Azərbaycanın ən güclü komandasıdı və mən onun üçün ən çox oyun keçirmişəm. İnsanlar bunu “rekordçu”, “əfsanə” kimi deyirlər. Belə uğur qazanmaq və liqanın ən yaxşı komandasında oynamaq mənim üçün xoşdur.

- Qurban Qurbanov 2008-ci ildən komandanı çalışdırır. Karyeranız boyu birlikdə işləmisiniz. Qurbanov sizə necə təsir edib?

- Mən gənc və ehtiyatsız idim. O, “Qarabağ”a gələndə ilk addımlarımızı birlikdə atdıq, çünki məşqçilik karyerasına yeni başlamışdı. Yaxşı və pis vaxtlarımız olub, amma biz həmişə bir yerdə olmuşuq. Mənə fərdi yanaşdığı üçün onu böyük qardaş hesab edirdim. Başa düşürdü ki, meydanda və ondan kənarda çox səhvlər etdim. Həm də bəzi problemlərim olanda həmişə onunla məsləhətləşmişəm. Ən maraqlısı odu ki, mən ondan heç vaxt qorxmamışam, ancaq hörmət etmişəm. O, həmişə mənim problemimin həllini tapmağa çalışırdı, çünki özümü meydanda nə qədər çətinləşdirdiyimi və uduzmağı sevmədiyimi başa düşürdü. Demək olar ki, bütün karyeramızı birlikdə keçirik və bütün nailiyyətlərimizə birlikdə çatırıq.

- Karyeranızın hansısa mərhələsində başqa kluba keçmək fikrində olmusunuz?

- Əvvəlcə bu barədə düşünmürdüm. Hər il nəticə daha da yaxşılaşır və yeni perspektivlər açılır. Bəli, başqa komandalardan da təkliflər var idi. Hətta məşqçiyə yaxınlaşıb bu barədə danışdım, amma fikrimi soruşduqda həmişə cavab verdim ki, özümü qorunan hiss etdiyim üçün burada qalmaq istəyirəm. Klub rəhbərliyi mənə hər zaman mehribanlıqla, anlayışla yanaşır, məşqçi bilir ki, ona nə qədər sevgim var. Gəlib daha çox pul qazanmaq istədiyimi deyə bilmədim. Heç vaxt ağlıma da gətirmirdim ki, pulu seçib, komandanı tərk edə bilərəm. Xüsusilə hər şey yaxşı gedirsə. Düşünürəm ki, artıq çox şeyə nail olmuşam və başqa kluba keçməkdənsə, karyeramı “Qarabağ”da başa vurmağım daha yaxşı olardı.

- Məsələn, Səudiyyə Ərəbistanından təklif gəlsəydi, qəbul etməzdiniz?

- Oğlum da mənə tez-tez bu sualı verir. Amma ona deyirəm ki, dünyada bütün pulları qazana bilməzsən. Çox qazanmağa və ailəmdən ayrı yaşamağa çalışmıram. Həmişə arzulayırdım ki, həyat yoldaşım və uşaqlarım yaxın olsunlar, hər şey nəzarət altında olsun. Ona görə də oğluma deyirəm ki, onunla burada işləməyə üstünlük verirəm. Həm ailəyə, həm də ona yaxşı olar və mən həmişə çörək pulu qazanmağa bir yer taparam.

- Peşəkar karyeranızı başa vurduqdan sonra “Qarabağ”da qalmaq istəyirsiniz?

- Karyeramın sonu yaxınlaşır. Futbolda qalmaq və biliklərimi yeni nəsillərə ötürmək istərdim. Bu gün gənc futbolçularla ünsiyyət qururam, onlara doğru yolu göstərirəm. Komandada qalmaq istərdim, amma seçim etməliyəm. Münki karyeram bitdikdən sonra məşğul olmaq istədiyim çoxlu sahələr var. Çoxları deyir ki, idman direktoru, məşqçi ola bilərəm və ya akademiyada işləyə bilərəm. Amma bu gün hansının daha yaxşı olduğunu dəqiq bilmirəm. Mən minimumdan maksimum yararlanan məşqçi ilə işləyirəm və onun işini öz gözlərimlə görürəm. Məşqçilik kateqoriyam yoxdu, amma bilik baxımından özümü ilkin kateqoriyalara yaxın hiss edirəm.

- “Qarabağ” son 10 ildə klub Azərbaycanda əsl hegemona çevrilib. Belə bir yüksəlişə səbəb nə oldu?

- Klubda çalışan hər kəsin işinə görə. Komandanın və məşqçinin işinə heç vaxt qarışmayan rəhbərlikdən başlayaraq. Məşqçi özü öz üzərində çox çalışıb. O, Qvardiola, Klopp və digər məşqçilərin yanına getdi. Azərbaycanda statusuna baxmayaraq, hələ də öz üzərində işləməyə davam edir. İnanıram ki, biz bütün aspektlərdə Azərbaycanın digər klublarından iki-üç dəfə çox iş görürük.

- Komandanın daimi uğurlarına münasibətiniz necədir?

- Düzünü desəm, artıq “Qarabağ”ı gümüşlə görmürəm. Bu gün güclü rəqabətin olduğu bir kompozisiyamız var. Hər il daha çox keyfiyyətli oyunçu gəlir, nəticələr daha da yaxşılaşır. Beləliklə, “Qarabağ” hegemona çevrilir. Çempionluğumuzu geri almaqdan başqa çarəmiz yoxdu. Mövsüm mayın sonunda başa çatır, martın sonunda isə artıq riyazi olaraq çempionluğu rəsmiləşdiririk.

- 10 komandadan ibarət çempionatda oynamaq necədir? Eyni rəqiblərlə oynamaqdan yorulmursunuz?

- Belə bir şey var. Axı çempionatda dörd turdan əlavə kubok da var. Bu yaxınlarda belə vəziyyətə düşdük: eyni rəqiblə ardıcıl üç oyun keçirdik. Çox çətindi, eyni rəqiblə üç oyun keçirəndə nəyi təhlil edəcəyiniz belə aydın deyil. Deməli, çempionatda klubların sayının az olması ürəkaçan deyil. İstərdim ki, 16 komanda olsun və iki dövrədə oynayaq. Maraqlı olardı.

- Bu mövsüm komanda Avropa Liqasının 1/8 finalına yüksəldi. Bu klubda olduğunuz müddətdə ən güclü “Qarabağ”dı?

- Bəli, nəticələr də bundan danışır. Nəticələrimizə nail olduğumuz yol: Azərbaycanda 26 xal öndəyik, Avropa Liqasında isə “Bayer” bizə güclə qalib gəldi. Bugünkü “Qarabağ” və onun ətrafındakı bütün sistem əvvəlki illərlə müqayisədə ən güclüdü.

- Mövsüm başlamazdan əvvəl klub avrokuboklarda hansı məqsədləri qarşısına qoymuşdu?

- Çempionlar Liqasının qrupuna düşməyi. Biz buna bir dəfə nail olduq və nəticəni təkrarlamaq istədik. Amma təəssüf ki, alınmadı. Amma Avropa Liqasının 1/8 final mərhələsinə adlayıb, məqsədimizi həyata keçirə bildik.

- Milli komanda və avrokuboklar səviyyəsində qarşılaşdığınız ən güclü futbolçu kim olub?

- Eden Azarı deyərdim. Karrasko, Pedro və bir çox başqalarına qarşı oynamışam. Amma Azar saxlaya bilmədiyim yeganə oyunçudu. Hansı ayağımı, hansı tərəfdən tutacağımı bilmirdim. O, sadəcə olaraq fenomenal oyunçu idi. Ronaldo ilə başa düşdük ki, vəzifə sadəcə topu ayağının altından çıxarmaqdı. Boyu uzun olduğu üçün sürətinə baxmayaraq, hərəkətləri oxunur. Amma Azarda bu, mümkün deyildi.

- Amma Messiyə qarşı oynaya bilmədiniz...

- Təbii ki, ona qarşı oynamaq istərdim. Çox təəssüf ki, bir daha oynamayacağıq, çünki o, Avropaya heç yerə gəlməyəcək. Düzdü, mən hələ də bir çox böyük futbolçularla oynaya bildim.

- Azərbaycan millisində Rəşad Sadıqovun rekordunu yeniləmək şansınızı necə qiymətləndirirsiniz?

- Artıq bir ildi çağırılmadığım üçün öz içimdə milli ilə vidalaşdım. Hər yerdə vaxtında olmaq lazımdı. Onsuz da, psixoloji cəhətdən çətin idi. Millidə heç bir parlaq məqama və ya nailiyyətlərə nail ola bilmədik, yeganə maneə budu. Yığma ilə ən yaxşı anlar güclü rəqiblərə qarşı oynadığınız zamandı. Biz tez-tez Almaniya və Portuqaliya ilə qarşılaşırdıq. Azərbaycan himninin sədaları altında meydançaya çıxmaq həmişə xoşdu.

- Gürcüstan və Ukrayna Avropa çempionatına vəsiqə qazandı. Azərbaycan niyə eyni uğuru göstərə bilmir?

- Sabitlik yoxdu, çünki Azərbaycanda son vaxtlar tez-tez məşqçi dəyişir. Hər kəs öz mentaliteti və fəlsəfəsi ilə gəlir. Məşqçilərin tez-tez dəyişməsi səbəbindən komanda öz oyun sistemini tapa bilmirdi. Gənclər komandalarını da həvəsləndirmək lazımdır ki, onlar da sistemə əməl etsinlər. Üstəlik, nəticə əldə etmək üçün heyətdə ən azı 50 oyunçu olmalıdı ki, rəqabət olsun. Çempionatda 10 komandamız olduğuna görə böyük heyət yaratmaq çətindi. Əcnəbi limiti var, ona görə də cəmi 40 yerli oynayır.

- Hazırkı “Qarabağ” Rusiya Premyer Liqasında hansı yerlər uğrunda mübarizə apara bilər?

- Deyərdim ki, hətta çempionluq uğrunda mübarizə apara bilərik. Çünki bu gün Rusiyada ancaq öz aralarında oynayırlar. Avropa matçları fasilədə olsa da, səviyyə düşür. Nəticələrimizə baxsanız, məncə, çoxları “Qarabağ”ın çempionluq uğrunda mübarizə apara biləcəyi ilə razılaşar.