Karlo Ançelotti 2025-ci ilin yayında keçiriləcək yeni klublararası dünya çempionatında “Real”ın iştirak etməyəcəyi ilə bağlı açıqlama vermişdi.

Matc.az xəbər verir ki, Madrid klubunun mətbuat xidməti bu məlumatı təqzib edən məlumat paylaşıb.

“2024/2025 mövsümündə FİFA tərəfindən təşkil olunacaq yeni Klublararası Dünya Çempionatında klubumuzun iştirakı heç vaxt şübhə doğurmayıb. Odur ki, klubumuz planlaşdırıldığı kimi, qürurla və maksimum həvəslə bu rəsmi yarışda, milyonlarla azarkeşimizin yeni titul qazanmaq arzusunu reallaşdırmaq üçün iştirak edəcək”, - deyə klubun mətbuat xidməti məlumat yayıb.

Xatırladaq ki, turnir yenilənmiş formatda keçiriləcək. Turnirdə yeddi klub əvəzinə 32 komanda iştirak edəcək. 2025-ci ildə klublararası dünya çempionatı Amerika Birləşmiş Ştatlarının stadionlarında keçiriləcək. Turnir iyunun 15-də başlayacaq və təxminən bir ay - 2025-ci il iyulun 13-dək davam edəcək.