"Barselona" fan mağazasında yeni bir aksesuar peyda olub və bu, artıq azarkeşlər arasında müzakirə dalğasına səbəb olub.

Matc.az xəbər verir ki, klubun rəsmi fan mağazası səhifəsində 190 avroya gümüş qələm satılır.

Təsvirə görə, bu lüks aksesuar yüksək cilalanmış örtüklü, düyməli, qısqaclı və əlavə davamlılıq üçün polad uclu 925 əyarlı gümüşdən hazırlanıb. Qələmin ölçüsü 13,7 sm, çəkisi isə 24 qramdır. Klub iddia edir ki, bu, "Barselona" azarkeşi üçün mükəmməl hədiyyə" olacaq.

Lakin azarkeşlər yeni məhsula o qədər də həvəsli deyillər. Yazının altındakı şərhlərdə qiymətə təəccübləndiklərini bildirirlər və klubun maliyyə çətinliklərini hər hansı bir vasitə ilə aradan qaldırmaq cəhdlərinə işarə edərək zarafatla "Laportanın yeni rıçağı" olduğunu bildirirlər.

Xatırladaq ki, "Barselona"nın ümumi borcu dünya futbolunda rekord həddə çatıb və təxminən 1,5 milyard avro təşkil edib.