"Turan Tovuz"un İdarə Heyətinin sədri Ehtiram Quliyev Misli Premyer Liqasının 3-cü turunun "Neftçi"(0:1) ilə görüşündən sonra açıqlama verib.

Matc.az həmin müsahibəni təqdim edir: 

- Komandanız səfərdə "Neftçi" üzərində 1:0 hesablı qələbə qazandı. Görüşü necə şərh edərdiniz?

- Maraqlı və çətin oyun oldu. Belə görünür ki, bu mövsüm çempionatımız çox ağır keçəcək. Komandamız hələ tam hazır deyil. Bilirsiniz ki, bəzi oyunçular sonradan komandaya qoşulub. İndi milli komandanın oyunları ilə əlaqədar çempionatda fasilənin yaranması bizim üçün çox yaxşı oldu. Bundan səmərəli istifadə etməliyik. İnanıram ki, fasilədən sonra daha yaxşı, daha şən futbol oynayan "Turan Tovuz" görəcəyik.

- 3 oyuna 6 xal. Startı necə dəyərləndirirsiniz?

- Çox gözəl. Oyunların üçün də çətin idi. İlk turda "İmişli" ilə süni qazonda oynayırdıq. "Araz-Naxçıvan" və "Neftçi" də iddialı və güclü komandalardır. Odur ki, ilk 3 turdakı nəticə bizi razı salır.

- "Transfer pəncərəsi" hələ bitməyib. Güclənməyi düşünürsünüz?

- Axtarışlarımız davam edir. Mümkün olsa 3, minimum isə 2 transfer reallaşdırmağı planlaşdırırıq. Hazırda çətin mərhələdəyik. Lakin danışıqlarımız gedir.

- Komandanın qarşısına çempionluq hədəfi qoymağınız bir qədər gözlənilməz oldu...

- Birinci növbədə futbolçular, daha sonra isə azarkeşlərimiz buna hazır olmalıdır. Turan ruhu böyükdür, mən komandaya bu ruhu qaytarmaq istəyirəm. Ona görə də komandanın qarşısına çempionluq hədəfi qoymaq istədim. Bu potensialı görürəm, komandaya inanıram. Çempionluq deyəndə çempioluğa oynamaq, son turlara qədər iddialı mövqedə olmaq nəzərdə tutulur. Başa düşürəm, çətindir, lakin yenə deyirəm, mən komandama güvənirəm. Oyunçuları və azarkeşləri də yavaş-yavaş buna inandırmaq istəyirik.

- Bu, komanda üzərində basqı yaratmayacaq?

- Yox, yaratmaz. Gedəcəyi yolu bilən insana dağlar çəkilib yol verər. Ona görə də mütləq gedəcəyin ünvan bilinməlidir. Oyunçular da artıq bunun hiss edirlər.

- Çempionluq maksimum hədəfdir. Yəqin ki, minimum hədəf də avrokuboklara vəsiqə olar. Elədir?

- Bu dəqiqə maksimumu istəyirik. Minimum barədə düşünmürük.

- Tovuz stadionunda son vəziyyət necədir?

- Yaxşıdır. Hər şey plana uyğun getsə, oktyabrın ikinci yarısında işlər yekunlaşmalıdır.

- "Qarabağ" Çempionlar Liqasının Liqa mərhələsinə vəsiqə qazandı. Buna münasibətiniz?

- "Qarabağ" bizim fəxrimizdir. Azərbaycanı Avropada layiqincə təmsil edir. Uğurlar arzu edirik. Ümidliyəm, inanıram ki, Liqa mərhələsində də bizləri sevindirəcəklər.

(qol.az)