09 Sentyabr 2022, 15:03
AVROPA LİQASI

Almaniyanın "Frayburq" komandasının hücumçusu Nils Petersen Avropa Liqasının qrup mərhələsinin ilk turu çərçivəsində "Qarabağ"a qarşı keçirdikləri oyunu şərh edib. Matc.az xəbər verir ki, o, 2:1 hesabı ilə qalib gəldikləri matçla bağlı Almaniya mətbuatına açıqlamasında bunları söyləyib:
 
"üç xal qazandığımız üçün sevinirik. Hesab 2:0 olduqdan sonra rahat atmosfer yarandı və insanlar düşündülər ki, asan oyun və əsl futbol şənliyi olacaq. Matçın startının uğurlu alınması məni də təəccübləndirdi".
 
Petersen buraxdıqları qoldan sonra yaxşı oynamadıqlarını söyləyib: "Bir anlıq çaşqınlıq yarandı. Düzdür, qələbə qazandıq. Amma bu oyunu tənqidi təhlil edəcəyik. Bizim üçün çətin başlanğıc idi. Hamı istənilən halda bizdən qələbə gözləyirdi. Amma rəqib pis oynamadı. Təsnifat mərhələsində bir neçə güclü komandanı mübarizədən kənarlaşdırıb. Qrupda bir neçə xal qazanacaqlarını düşünürəm".
 
34 yaşlı hücumçu ilk 25 dəqiqədən sonra zəif çıxış etmələrinin səbəbini açıqlayıb: "Rəqibin "əl"inə oynamağa başladıq. Nəticədə onlara boş sahə verdik. Qonaqların əsas istəyi də məhz bu idi. Topla çox yaxşı rəftar edirdilər. Hərdən sadəcə, onları izləyirdik. Bəzi epizodlarda isə rəqibi topdan məhrum edirdik. Lakin bu, tez-tez olmurdu. Xoşbəxtlikdən, qalib gəldik. Əsas nəticədir. "Qarabağ" bizdən qat-qat artıq beynəlxalq təcrübəyə malikdir. Fikrimcə, gələn həftə Pireydə bu cür təzyiqə məruz qalmayacağıq".
 
"Qarabağ" və "Frayburq" arasında növbəti oyun noyabrın 3-də Bakıda keçiriləcək.

XƏBƏRİ PAYLAŞ
  • gplus
  • pinterest