“Qarabağ” Çempionlar Liqasının III təsnifat mərhələsində “Molde” ilə matç üçün Kiprə yollanıb. Matc.az xəbər verir ki, baş məşqçi Qurban Qurbanov hava limanında jurnalistlərin suallarını cavablandırıb. 

- Komandanın hazırlığı pis deyil. Sadəcə, bəzi problemlərimiz var. Bəzi futbolçularımızın hazır olmaması məni bir az narahat edir. Millinin oyunlarına görə uzun müddətdir ki, futbolçular bir yerdə deyildilər. “Keşlə” ilə matça 1 gün qalmış hamımız toplana bildik. Bundan sonra isə 2 gün tam vaxtımız oldu ki, kollektiv olaraq bütün futbolçular birlikdə hazırlaşsın. Amma dediyim kimi, ümumi durum pis deyil. Sadəcə bir neçə futbolçumuzun mikrozədələri var və bu, məni bir az narahat edir.

- Zədəli oyunçulardan Mahir Emreli matçda iştirak edəcək?
- Oyuna kimi Mahirin tam hazır olub-olmayacağını bilməyəcəyik. Dünən məşq etdi. Amma məşqin sonuna qədər saxlamadıq. Bir az ağrıları hiss olundu. Dedilər ki, normaldı. Qəti qərar vermək üçün 2 gün vaxtımız var.

- UEFA-ın oyunu neytral meydana salması haqda qərarı sizi narahat etdi?
- Sırf buna görə narahat olduğumu düşünməzdim. Sadəcə gec bildirmələri məni narahat etdi. Çünki püşkdən dərhal sonra desəydilər ki, matç neytral zonada olacaq, bizim üçün daha rahat olardı. Oyuna 1 həftə qalmış belə bir fikir bildirmək bizim üçün narahatlıq yaratdı. Amma bu, UEFA-nın qaydalara uyğun olaraq verdiyi qərardı. Rəqib də, biz də qəbul etməliyik.

- “Molde” haqda fikirləriniz necədi? Bu mövsümkü digər rəqiblərinizdən nə ilə fərqlənir?
- Çempionatda səhv etmirəmsə, 15 və ya 16 matçda oynamışdılar. Sadəcə milli komandaların oyunları ilə bağlı 2 turu buraxmışdılar. Ümumiyyətlə, çox nizam-intizamlı komandadı. Fərqli üslubda oynayır. Görünür, bu turnirə çox ciddi hazırlaşırlar. Hər bir halda bu tip komandalara qarşı çıxış etmişik və inanıram ki, rəqibi düzgün analiz edib, düzgün oyun qura biləcəyik.

- Matçın neytral meydana salınması futbolçuların motivasiyasına nə kimi təsiri olub?
- Bəzən bunun futbolçulara faydası olur. Amma bəzən də həddindən artıq çox motivasiya olanda bunun oyunçulara zərəri dəyir Bizim işimiz ondan ibarətdi ki, bunları orta səviyyədə saxlayaq. Biz nə qədər motivasiya versək də, meydançada istədiyimizi edə bilməsək, onda motivasiyanın bir köməyi olmayacaq. Çünki biz həm fiziki, həm psixoloji, həm də taktiki cəhətdən tam hazır olmalıyıq.

- Komanda penaltilər seriyasına hazırdı? Bunun üzərində işləmisiz?
- Bu, bəzən sirr olaraq qalır. Amma mən heç vaxt oyundan əvvəl penaltilərə hazırlaşmağı xoşlamıram. Çünki futbolçularda o psixoloji vəziyyəti yaratmaq istəmirəm. Çünki biz ilk 90 dəqiqəni fikirləşəcəyik. Penaltilər isə sondakı qərardı. Çalışacağıq ki, futbolçuları oyuna yaxşı motivasiya edək və ilk 90 dəqiqədə istədiyimiz nəticəni qazanaq. Sadəcə dediyim kimi, matça 1-2 gün qalmış penaltilər seriyasına hazırlaşmaq futbolçularda inamsızlıq yarada bilər. Amma belə təxmini bilirəm ki, kim penaltini yaxşı vurur, kim zəif (gülür).

- “Neftçi” – “Qalatasaray” oyunu ilə bağlı fikirləriniz necədi?
- Əvvəlcə, “Neftçi”yə uğurlar arzulayıram. Belə komandaların Azərbaycana gəlməsi futbolumuzun inkişafına böyük təkandı. İnsanlarda futbola sevgi daha da çoxalır. Xüsusən tanınmış klublar gələndə. Düşünürəm ki, “Qalatasaray”ın - Türkiyənin 4-5 TOP komandasından birinin Bakıya gəlməsi bizim futbolumuza böyük  fayda verəcək. Əlbəttə ki, “Neftçi”nin qalib gəlməsini istərdik. Düzdür, qardaş ölkənin klubudur. Amma idmanın prinsipləri elədir ki, daim qalib gəlmək istəyirsən. (Qol.az)

 

XƏBƏRİ PAYLAŞ
  • gplus
  • pinterest