16 Aprel 2022, 20:28
TOP OYUNLARI

Qadın voleybolçular arasında Azərbaycan Super Liqasında son turun oyunları keçirilib.

Qadın voleybolçular arasında Azərbaycan Super Liqasında son turun oyunları keçirilib. Matc.az xəbər verir ki, Azərbaycan Voleybol Federasiyasının idman zalında təşkil olunan 12-ci turun ilk görüşü "Abşeron" və "Murov" komandaları arasında baş tutub.
 
Mövsümün məğlubedilməzi "Abşeron" son matçdan da qalib ayrılıb. Əvvəlki oyunlarında bir xal belə itirməyən Eldar Yusubovun komandası bu matçda da qələbəyə sevinib. "Abşeron" 3:1 (25:21, 25:19, 19:25, 25:19) hesabı ilə "Murov"u məğlub edib və aktivinə daha 3 xal  yazdırıb.
 
Turun və mövsümün son matçı isə "Azərreyl" və UNEC komandaları arasında olub. Bu matçda da qalib 4 setdə müəyyənləşib. "Tələbələr"i 3:1 (25:18, 25:16, 16:25, 25:23) hesabı ilə məğlub edən Famil Ağayevin komandası çempionatı qələbə ilə başa vurub.
 
Beləliklə, qadın voleybolçular arasında Azərbaycan Super Liqasında 2021/22 mövsümü başa çatıb. 36 xalla "Abşeron" Super Liqanın çempionu tituluna yiyələnib. "Azərreyl" 20 xalla gümüş medalın sahibi, "Murov" isə 11 xalla çempionatın bürünc mükafatçısı olub. UNEC isə 5 xalla turnir cədvəlini sonuncu yerdə bitirib.
 
Komandaların mükafatlandırma mərasimi 1-ci Liqa və Yüksək Liqa yarışlarının qalibləri ilə eyni vaxtda olacaq.
 
Qeyd edək ki, Super liqa yarışlarında 4 klub "Azərreyl", "Abşeron", "Murov" və UNEC mübarizə aparıb. Komandalar 4 dövrədə mübarizə aparıb, ən çox xal toplayan komanda çempionatın qalibi olub.

XƏBƏRİ PAYLAŞ
  • gplus
  • pinterest