Məhəmməd Salah mövsümün sonunda "Liverpul"dan ayrılacağını açıqlayıb.

Matc.az xəbər verir ki, o, bu barədə sosial media hesabında paylaşım edib.

"Hər kəsə salam. Təəssüf ki, bu gün gəldi. Bu, vidalaşmağımın ilk hissəsidir. Mövsümün sonunda "Liverpul"dan ayrılacağam. Əvvəlcə demək istəyirəm ki, bu klubun, bu şəhərin, bu insanların həyatımın nə qədər vacib bir hissəsinə çevriləcəyini heç vaxt təsəvvür etməmişdim. "Liverpul" sadəcə bir futbol klubundan daha çox şeydir; onun ehtirası, tarixi və ruhu var. Bunu sözlə izah edə bilmərəm.

Qələbələri qeyd etdik. Ən vacib kubokları qazandıq. Həyatımızın ən çətin anlarında birlikdə mübarizə apardıq. Burada olduğum müddətdə bu klubun bir hissəsi olan hər kəsə, xüsusən də keçmiş və hazırkı komanda yoldaşlarıma, eləcə də azarkeşlərə təşəkkür etmək istəyirəm. Söz tapa bilmirəm - karyeramın ən yaxşı vaxtlarında mənə verdiyiniz dəstəyi, ən çətin anlarda yanımda olmağınızı heç vaxt unutmayacağam və həmişə xatırlayacağam", - deyə Salah paylaşımında bildirib.

Qeyd edək ki, Salah 2017-ci ildən "Liverpul"da oynayır. Bu müddət ərzində 33 yaşlı hücumçu bütün turnirlərdə 435 oyunda meydana çıxıb, 255 qol vurub və 122 məhsuldar ötürmə edib. Onun klubla hazırkı müqaviləsi 2027-ci ilin yayına qədərdir. "Transfermarkt"da futbolçunun dəyəri 30 milyon avrodur.