"Cərimə meydançası yaxınlığında inamlı qalmaq və fürsətlərimizi gözləmək istəyirdik. Bu imkanlar gec yarandı, amma onları dəyərləndirdik. Qələbəyə layiq idik".

"Bavariya"nın qapıçısı Manuel Noyer UEFA Çempionlar Liqası 1/4 final mərhələsinin "Real"la cavab oyunundan sonra açıqlama verib.

Matc.az xəbər verir ki, almaniyalı qolkiper qələbəyə layiq olduqlarını bildirib:

"Düşünürəm ki, ilk növbədə baş verənləri dərk etməliyik. Bu, əsl Çempionlar Liqası gecəsi idi. Həm tamaşaçılar, həm də bizim üçün bu, şübhəsiz ki, xüsusi bir şey idi. İlk qol epizodunda əslində topu Yosip Stanişiçə ötürmək istəyirdim, amma zərbəni düzgün vura bilmədim. Bu, mənim tərəfimdən uğursuz ötürmə idi. Daha sonra Arda Güler sol ayağı ilə bir toxunuşda fenomenal zərbə vurdu. Bunu sonradan cərimə zərbəsi zamanı da gördük. Ardanın gücü məhz bundadır. Buna baxmayaraq, öz oyunumuza sadiq qaldıq. Cərimə meydançası yaxınlığında inamlı qalmaq və fürsətlərimizi gözləmək istəyirdik. Bu imkanlar gec yarandı, amma onları dəyərləndirdik. Qələbəyə layiq idik. Qarşıda bizi PSJ ilə daha bir bərabər səviyyəli qarşılaşma gözləyir. Son oyunlarımız həmişə gərgin keçib. Parisdə, sonra isə öz meydanımızdakı oyunu səbirsizliklə gözləyirik. Atmosfer möhtəşəm idi. Bunu yenidən yaşamaq istəyirik".

Qeyd edək ki, "Bavariya" iki matçın nəticəsinə görə 6:4 hesablı üstünlük əldə edərək yarımfinala yüksəlib. Münhen təmsilçisi bu raundda PSJ ilə üz-üzə gələcək.