Liqa 1 istisna olmaqla, bütün top-liqalar FİFA rəhbərliyində islahatlar aparmağa çağırış etməyə hazırlaşır.

Matc.az xəbər verir ki, bu barədə "Sky News" telekanalı məlumat yayıb.

Bildirilir ki, Premyer Liqa, Bundesliqa, La Liqa və A Seriyası Beynəlxalq Futbol Federasiyasında islahatların aparılması ilə bağlı birgə bəyanat yayacaq. Bu addımın məqsədi daha müstəqil nəzarəti təmin etmək və qərarların qəbulunda maraqlı tərəflərə, o cümlədən liqalara əhəmiyyətli rol verməkdir.

Bununla belə, çempionatların FİFA rəhbəri Canni İnfantinonun istefasını tələb edib-etməyəcəyi hələlik məlum deyil.

Top-liqaların bu mövqeyi FİFA-nın millilərin təqvimi ilə bağlı yürütdüyü siyasətdən narazılıqla əlaqələndirilir. Oyunların sayının artması və milli komandaların turnirlərinin genişləndirilməsi ehtimalı aparıcı liqalarda ciddi narahatlıq doğurur.

Xatırladaq ki, 2024-cü ilin noyabrında FİFPro, Avropa Klublar Assosiasiyası və La Liqa Avropa Komissiyasına FİFA əleyhinə birgə şikayət ünvanlamışdılar.