“Qarabağ” əvəzləmədən meydana daxil olaraq qol vuran futbolçularının sayına görə Avropada 3-cü pillədə qərarlaşır. Matc.az saytının məlumatına görə, Ağdam klubunun oyunçuları Misli Premyer Liqasının geridə qalan 12 matçında sonradan mübarizəyə qoşularaq ümumilikdə 9 dəfə fərqləniblər.

Qurban Qurbanovun kollektivi bu göstəriciyə görə, Avropanın ölkə çempionatlarında “Ayaks”la birlikdə 3-cü yeri bölüşdürür. Amsterdam klubunun yeganə üstünlüyü Niderland çempionatında bunu 11 matçda həyata keçirməsidi.

“Qarabağ”ı “köhnə dünya”dan yalnız iki komanda qabaqlayır. “Srvena Zvezda”nın əvəzetmələri Serbiya Superliqasında 14 qarşılaşmada 11, “Mexelen” sonradan meydana daxil olanları isə Belçika liqasında eyni sayda matçda 10 dəfə fərqləniblər.

Qeyd edək ki, 31 xalla Misli Premyer Liqasına başçılıq edən “Qarabağ” 12 görüşdə 32 qol vurub.