Topaz Premyer Liqasında 2018-ci ilin komandası müəyyənləşib. Matç.az saytı xəbər verir ki, bu il keçirilən çempionat oyunlarına əsasən "Neftçi" ən yaxşı olub.

Paytaxt təmsilçisi 2017/18 mövsümünün ikinci yarısında 30, 2018/19 mövsümünün ilk 14 turunda 33 xal qazanıb. 28 görüşdə 19 qələbə qazanıb, 6 heç-heçə edib, yalnız 3 dəfə uduzan bakılılar 48 qolla məhsuldarlıqda da 1-ci olub.

"Neftçi" son illərdə həm mövsümdə, həm il ərzində ən yaxşı olan "Qarabağ"ı arxada qoyub. Ağdam təmsilçisi ötən mövsümün sonunda 2, cari mövsümün əvvəlində 3 xal az toplayıb. Əyalət klubu ən az qol buraxmaqda hamıdan üstün göstəriciyə imza atıb.

"Keşlə", "Sumqayıt" və "Qəbələ" bu il eyni xala malik olub. Əlavə göstəricilər - qələbə sayı və top fərqinə görə bakılılar 3-cü, sumqayıtllar 4-cü, qəbələlilər 5-cidi.

Qeyd edək ki, 2018-ci ildə keçirilən 112 qarşılaşmadan ikisində texniki nəticə qeydə alınıb. Digər 110 oyunda 249 qol vurulub.