Veteran güləşçi Mariya Stadnik karyerasını bitirməsi haqda danışıb. Matc.az xəbər verir ki, hazırda Azərbaycan Güləş Federasiyasının qadın güləşi üzrə koordinatoru vəzifəsində çalışan Stadnik “NV Sport”a açıqlamasında maraqlı fikirlər səsləndirib.

“Əslində, son olimpiadadan əvvəl də dərk edirdim ki, bu, son çıxışım olacaq. Sadəcə, soyuq başla düşünmək, hisslərimi yoxlamaq üçün özümə bir qədər vaxt verdim. Həmin ərəfədə güləş üçün darıxmadığımı görüncə, karyeramı bitirmək qərarına gəldim”, - deyə Stadnik vurğulayıb.

Olimpiadadan sonra səhhətində problem yarandığını qeyd edən Mariya bunları əlavə edib: “Səhhətim bir qədər pisləşdiyi üçün başa düşdüm ki, formada qalmalıyam. Bədənim at kimi işləməyə öyrəşmişdi və karyeramı bitirəndə qan təzyiqi, ürək problemi ilə üzləşdim. Buna görə də yenə hər gün idman zalına gedirəm. Yeni işim də güləşlə bağlıdı. Yəni idmandan tam uzaqlaşmamışam”.

Qeyd edək ki, Mariya Stadnik Olimpiya Oyunlarının 4 qat mükafatçısı, 2 qat dünya və 10 qat Avropa çempionudu.