23-27 aprel tarixlərində Monteneqronun paytaxtı Podqoritsa şəhərində böyüklər arasında cüdo üzrə Avropa çempionatı keçiriləcək. Matc.az xəbər verir ki, bu barədə Cüdo Federasiyasının mətbuat xidməti məlumat yayıb.

Turnirdə Azərbaycan 12 çəki dərəcəsində ümumilikdə 16 cüdoçu (9 kişi, 7 qadın) ilə fərdi yarışlarda təmsil olunacaq.

Azərbaycan Avropa çempionatları tarixində ilk dəfə böyüklər arasında qarışıq komanda yarışında da iştirak edəcək. Olimpiya çempionlarımız Hidayət Heydərov və Zelim Kotsoyev Paris Olimpiadasından sonra ilk dəfə tatamiyə ayaq basacaqlar.

Milli komandanın üzvləri performans direktor və böyüklərdən ibarət yığmanın baş məşqçisi Riçard Trautman, böyük məşqçilər Elçin İsmayılov, Robert Kravçik və Slavko Tekiç, qadınlardan ibarət yığmanın baş məşqçisi Amina Abdullatif və məşqçi Saşa Herkenrat-Vimarın rəhbərliyi ilə tatamiyə çıxacaqlar.

Çempionata qatılacaq heyəti təqdim edirik:

Kişilər: Əhməd Yusifov, Turan Bayramov (-60 kq), Ruslan Paşayev (-66 kq), Hidayət Heydərov (-73 kq), Zelim Tçkayev, Ömər Rəcəbli (-81 kq), Zelim Kotsoyev (-100 kq), Uşanqi Kokauri (+100 kq).

Qadınlar: Könül Əliyeva (-48 kq), Aydan Vəliyeva, Gültac Məmmədəliyeva (-52 kq), Fidan Əlizadə (-57 kq), Günel Həsənli, Südabə Ağayeva (-70 kq), Nigar Süleymanova (+78 kq).

Qeyd edək ki, -90 kq çəki dərəcəsində iştirakçı Dubrovnikdə keçiriləcək Avropa Kubokundan sonra müəyyən ediləcək. Vüsal Qələndərzadə isə -73 kq çəki dərəcəsində qarışıq komanda yarışlarında heyətə qoşulacaq.