2026/2027 mövsümündə Avropa kuboklarında təmsil olunacaq Azərbaycanın voleybol klublarının oyun proqramı müəyyənləşib.

2026/2027 mövsümündə Avropa kuboklarında təmsil olunacaq Azərbaycanın voleybol klublarının oyun proqramı müəyyənləşib.

Matc.az xəbər verir ki, bu barədə Azərbaycan Voleybol Federasiyasının mətbuat xidməti məlumat yayıb.

Çempionlar Liqasının 2-ci təsnifat mərhələsində mübarizə aparacaq "Turan"ın qadın voleybolçulardan ibarət komandası ilk matçını oktyabrın 20-də saat 19:00-da Tovuz Olimpiya İdman Kompleksində Xorvatiyanın "Mladost" (Zaqreb) klubuna qarşı keçirəcək. Cavab qarşılaşması oktyabrın 29-da saat 20:00-da Zaqrebdə olacaq.

Turnirdəki digər təmsilçi "Xilasedici"nin kişi voleybolçulardan ibarət komandası ilk görüşündə noyabrın 3-də saat 18:00-da Bakıda, Fövqəladə Hallar Nazirliyinin (FHN) idman zalında Portuqaliyanın "Sportinq" (Lissabon) kollektivini qəbul edəcək. Tərəflər arasında cavab matçı noyabrın 11-də saat 19:30-da Lissabonda baş tutacaq.

Çelenc Kubokunun 1/32 final mərhələsində yarışacaq "DH Volley"in qadın voleybolçulardan ibarət komandası oktyabrın 27-də saat 19:00-da Danimarkada "Holte" komandasının qonağı olacaq. Cavab oyunu noyabrın 5-də saat 18:00-da Bakıda, FHN-in idman zalında təşkil olunacaq.

"Ordu"nun kişi voleybolçulardan ibarət komandası isə ilk matçında noyabrın 11-də saat 19:30-da səfərdə Norveçin "Forde" klubu ilə üz-üzə gələcək. Bu cütün cavab görüşü noyabrın 19-da saat 18:00-da Bakıda, Gənclər və İdman Nazirliyinin Voleybol Mərkəzində keçiriləcək.