"Liverpul"un və İngiltərə millisinin keçmiş futbolçusu, hazırda "Əl-İttifaq"ın baş məşqçisi Stiven Cerrard qeyd edib ki, Kristiano Ronaldonun "Əl-Nəsr"ə keçidi Səudiyyə Ərəbistanı Pro Liqasının inkişafı üçün həlledici əhəmiyyətə malikdir.

Matc.az xəbər verir ki, o bu barədə yerli mətbuata açıqlama verib: “Tarixin ən yaxşı oyunçusu olan Ronaldonun transferi açıq-aydın böyük transfer idi. Onun hələ futbola verəcəyi çox şey var. Altı ay ərzində Ronaldonun oyununu izlədim. Bəzi matçlara və oyunların icmallarına baxdım. Düşünürəm ki, o vaxtdan bəri çoxları bu liqa haqqında danışmağa başlayıb. Ronaldo gələndən sonra digər məşhur və istedadlı futbolçular da bura gəldilər. Bu, özümü işsiz tapdığım və yeni fürsət axtardığım vaxta təsadüf etdi. Uzaqdan baxanda heyran oldum. Agent bu bölgədən bir neçə variant təklif edəndə, onları araşdırmaqdan çox məmnun oldum”.