“Çelsi”nin hücumçusu Liam Delap Çempionlar Liqasında “Barselona” üzərində qazanılan 3:0 hesablı qələbəni şərh edib.

Matc.az xəbər verir ki, ingiltərəli forvard istənilən rəqibə qarşı oynaya biləcəklərini deyib:

“Bu, inanılmaz idi. Belə gecələri arzulayaraq böyüyürsən. Buna görə də bu, mənim üçün çox xüsusi bir an oldu. Oyuna dair planımız var idi. Hamı onu çox yaxşı yerinə yetirdi. Məncə, bu, əla çıxış. Bu işin içində olan hər kəs üçün möhtəşəm bir gecə idi. İnanıram ki, burada həqiqətən gözəl bir şey qururuq. Hər gün birlikdə çalışırıq və daha da yaxşı oluruq. Hər oyuna böyük inamla çıxırıq. Bu gün göstərdik ki, istənilən rəqibə qarşı oynaya bilərik.

Biz “Barselona”nın nə qədər güclü olduğunu və nə qədər yaxşı futbolçulara sahib olduğunu bilirdik. Amma onların müdafiə xəttinin çox irəli olduğunu da anlayırdıq. Müdafiədə etibarlı olmalı idik ki, onları cəzalandıra bilək. Müdafiədə hamı çox inamlı çıxış etdi".