06 May 2020, 00:10

Koronavirus pandemiyasına görə təxminən iki aydı məcburi istirahətə göndərilən "Barselona"nın futbolçuları sabahdan etibarən klubun bazasında bir araya gələcəklər.
 
Matc.az xəbər verir ki, bu barədə Kataloniya təmsilçisinin rəsmi saytı məlumat yayıb.
 
Xəbərdə qeyd olunur ki, İspaniya La Liqasının inspektoru bu gün klubun bazasına gələrək mövcud vəziyyətlə tanış olub. O, "Barselona" futbolçularının məşqlərə başlamasına icazə verib. Sabah futbolçular uzun fasilədən sonra ilk dəfə klubun bazasında bir araya gələcəklər. Lakin bütün kollektiv öncə koronavirus testindən keçəcək. Bütün analizlər ürəkaçan olsa, futbolçular fərdi qaydada, sosial məsafə qaydalarına əməl etməklə məşqlərə başlayacaqlar.
 
Yeri gəlmişkən, İspaniya çempionatında 2019/20 mövsümünün lideri olan "Barselona"nın koronavirus pandemiyası ilə əlaqədar turnirlərin təxirə salınmasına görə 120-140 milyon avroluq maliyyə itkisi ilə üzləşdiyi məlum olub. Bunu yerli mətbuata açıqlamasında klubun vitse-prezidenti Jordi Kardoner deyib. Onun sözlərinə görə, "Barselona" matçlara və klubun muzeyinə bilet satışının olmamasından təxminən 50 milyon avro, televiziya verilişlərindən 39 milyon avro, klub dükanları və futbol məktəbi daxil olmaqla potensial kommersiya gəlirlərindən 20 milyon avro itirib.
 
İspaniya çempionatı mart ayında dayandırılıb. 27 turdan sonra "Barselona" 58 xalla turnir cədvəlinə başçılıq edir.

XƏBƏRİ PAYLAŞ
  • gplus
  • pinterest