Gürcüstan millisinin hücumçusu Xviça Kvaratsxeliya 2024-cü il Avropa çempionatının qrup mərhələsinin 3-cü turunun Portuqaliya ilə qarşıdakı oyunu haqda danışıb.

Matc.az xəbər verir ki, bu barədə futbolçu “RB Sport”a açıqlama verib.

“Düşünürəm ki, keçmiş matçlar haqqında danışmaq düzgün deyil. Sadəcə Portuqaliya haqda düşünmək lazımdır. AVRO-2024-də daha çox şeyə layiq idik, amma bu, futboldur. Portuqaliya ilə görüş bizim prioritetimizdir.

Çətin oyun olacaq, çox motivasiyalıyıq. Portuqaliya artıq pley-offa yüksəlib, bizdə isə ikiqat motivasiya var. Biz hər şeyi edəcəyik. Çoxları bizim Avro 2024-ə vəsiqə qazanacağımıza inanmırdı, amma buradayıq. İndi qələbə qazanmaq, pley-offa yüksəlmək barədə düşünürük. Şanslar bir faiz olsa belə, hər şey mümkündür”.

Xatırladaq ki, Gürcüstan yığması ilk oyunda Türkiyə millisinə 1:3 hesabı ilə uduzmuşdu. 2-ci turda Gürcüstan Çexiya ilə bərabərə qalıb. AVRO-2024-ün qrup mərhələsinin final mərhələsinin Gürcüstan və Portuqaliya matçı iyunun 26-da keçiriləcək.