"İnter Mayami" müntəzəm MLS çempionatının 22-ci turunun matçında "Toronto"ya məğlub olub. Mayamidəki "Nu Stedium" arenasında keçirilən görüş qonaqların 2:1 hesablı qələbəsi ilə başa çatıb.

Matc.az xəbər verir ki, bu barədə "Champion" idman nəşri məlumat yayıb.

Bildirilir ki, qonaqlar 59-cu dəqiqədə Coşua Sarcentin zərbəsindən sonra hesabı açıblar. 3 dəqiqə sonra Derrik Etyen "Toronto"nun üstünlüyünü ikiyə çatdırıb. "İnter Mayami" yalnız 83-cü dəqiqədə fərqi azalda bilib. Lionel Messi Rodriqo De Paulun ötürməsini qola çevirib.

Messi üçün bu qol çempionatda 18 oyunda 14-cü olub və o, bombardirlər siyahısında ikinci yeri tutur. Bununla belə, meydan sahibləri məğlubiyyətdən qaçmağı bacarmayıblar və mövsümdə dördüncü uğursuzluqla üzləşiblər.

Hazırda komanda 39 xalla Şərq konfransında ikinci pillədə qərarlaşıb.