İsveçrənin Nyon şəhərində UEFA Gənclər Liqasında çıxış edən klubların nümayəndələri üçün məşqçi forumu keçirilib. Matç.az klubun saytına istinadən xəbər verir ki, noyabrın 12-də start götürən tədbir iki gün davam edib.

Avropa Futbol Evində təşkil olunan tədbirə yarışın II mərhələsinə yüksələn "Qəbələ"nin təmsilçiləri də qatılıb. Klubun futbol akademiyasının meneceri Nail Kərimov və U-19 komandasının baş məşqçisi Emin İmaməliyev də forum iştirakçıları arasında yer alıb.

Forumun ilk günündə müxtəlif mövzularda mühazirələrə yer verilib, həmçinin iştirakçılar Hollandiyanın "Ayaks" klubundakı məşqçi metodologiyası, Fransa "Lion"unun akademiyasındakı təşkilatı işlərin necə qurulması ilə tanış olublar. Nümayəndələr arasında UEFA Gənclər Liqası turniri ilə bağlı fikir mübadilələri aparılıb. İlk gün qonaqlar arasında futbol matçı ilə yekunlaşıb.

Forumun ikinci günündə də tədbir iştirakçıları mühazirələr dinləyiblər. Mərasimə Avstriya "Zaslburq"unun baş məşqçisi Marko Rosenin mühazirəsi ilə yekun vurulub.