19 yaşadək futbolçulardan ibarət Azərbaycan yığma komandasının hazırlıq planı məlum olub. Matç.az saytı xəbər verir ki, komandamız oktyabrın 20-dən etibarən Bakıda təlim-məşq toplanışı keçirəcək.

Oktyabrın 22-də Bolqarıstana yola düşəcək yığmamız ayın 26-dək burada hazırlıq keçəcək. Vüqar Məmmədin yetirmələri təlim-məşq toplanışı çərçivəsində oktyabrın 23-də və 25-də Bolqarıstanın müvafiq yaş qrupundan ibarət komandası ilə iki yoldaşlıq oyunu keçirəcək.

Millinin hazırlıq prosesində Kamran Quliyev ("Yonova", Litva), Ruslan Ərzumanov ("Krasnodar", Rusiya), Nicat Mehbalıyev, İbrahim Hüseynov, Rauf Hüseynli, Zamiq Əliyev, Turan Vəlizadə, Tural Bayramov, Elvin Cəfərquliyev, Elvin Talıbov, Xəqani Sadıqov (hamısı "Qarabağ"), Nail Alışov, Elcan Hafizli (hər ikisi "Neftçi"), Kamran Məmmədov, Elçin Mustafayev, Şakir Seyidov, Emil Qasımov (hamısı "Sabah"), Elnur İbrahimov ("Spartak-2", Moskva, Rusiya), Rüfət Abdullazadə ("Sumqayıt"), Hüseyn Əhmədov ("Zirə") iştirak edəcək.