Fransa millisinin baş məşqçisi Didye Deşam AVRO-2024-ün 1/4 finalında Portuqaliya üzərində qazandıqları qələbəni (0:0, penaltilər - 5:3) şərh edib.

Matc.az xəbər verir ki, o, bu barədə UEFA-nın rəsmi saytına danışıb:

“Çox intensiv və gərgin oyun oldu. Vəziyyət istənilən istiqamətdə dəyişə bilərdi, baxmayaraq ki, sonda daha çox işləməli olduq - əlavə vaxtda topa daha az sahib idik. Futbolçularımız bir az yorğun idilər, bu, bəzi epizodlarda ciddi rol oynadı, amma mən uşaqlardan razıyam. Onlar bütün güclərini ortaya qoydular və matçın nəticəsini bizim xeyrimizə çevirdilər”.

Mütəxəssis əlavə vaxtın birinci hissəsindən sonra hücumçu Kilian Mbappeni niyə əvəzlədiyini də açıqlayıb.

“Açığı, Mbappe çox yorğun idi, onun üçün asan olmadı. Əlavə vaxtın ilk yarısında necə əziyyət çəkdiyini gördüm. Penalti oyunçumuz olsa belə, onu meydanda saxlamağın mənası yox idi. Kilian həmişə mənə və komandaya qarşı dürüst olub. Mənim üçün onu əvəzləyərək heyəti yeniləməyə çalışmaq normal idi”.