UEFA Millətlər Liqasının IV turunda Türkiyə səfərdə İtaliya yığmasına 3:1 hesabı ilə uduzub.

Matc.az xəbər verir ki, Türkiyə millisinin baş məşqçisi Vinçenso Montella məğlubiyyəti şərh edib:

"Mən baş məşqçi kimi uşaqların davranışından və xarakterindən razıyam. Qarşılaşmanın sonunda düzgün qərar vermədiklərinə və ya cərimə meydançasını lazımi səviyyədə qorumadıqlarına görə onları qınaya bilərdim, lakin bu səviyyədə futbolun təbiəti belədir. Əminəm ki, uşaqlar belə bir oyunda əvəzsiz təcrübə qazanacaqlar, çünki bir an qol buraxmağa səbəb ola bilər və bu, nəticədə oyunun taleyini həll edir.

Məsələ nəyinsə işləməməsində deyil, sadəcə biz özümüz üçün yeni bir səviyyəyə çıxmışıq. Futbolda bəzən hər şey çox sadədir: komandanın səviyyəsini qaldıra biləcək əsas futbolçular çatışmır. Biz müəyyən bir yolla getməyə qərar verdik və qarşıdakı Avropa çempionatının seçmə mərhələsini keçməyə çalışmaq da bizim üçün vacibdir. Gələcəyə baxdığımız üçün, hətta öz klublarında belə böyük təcrübəsi olmayan gənc oyunçuları cəlb etdik".

Qeyd edək ki, UEFA Millətlər Liqasının A Liqasının I qrupunda yer alan Türkiyə millisi keçirdiyi 4 oyunun hamısında məğlub olub. Vinçenso Montellanın yetirmələri İtaliyaya 1:3 və 1:4, Fransaya 0:1, Belçikaya isə 0:3 hesabı ilə uduzublar. Aktivində xalı olmayan "ay-ulduzlular" turnir cədvəlinin sonuncu – 4-cü pilləsində qərarlaşıblar. Qrupa isə 10 xalla Fransa rəhbərlik edir.