Futbol üzrə İngiltərə və Fransa milliləri arasında keçirilən 2026-cı il dünya çempionatının üçüncü yer uğrunda matçı ingilislərin 6:4 hesablı qələbəsi ilə başa çatıb ki, bu da XXI əsrin dünya çempionatları tarixinin ən məhsuldar oyunudur.

Matc.az xəbər verir ki, bu barədə FİFA-nın mətbuat xidməti məlumat yayıb.

Bildirilir ki, bu qarşılaşma həm də dünya birincilikləri tarixinin ən çox qol vurulan ilk 5 oyunu sırasına daxil olub. Sözügedən görüş digər maraqlı nailiyyətlərlə də yadda qalıb. Belə ki, Fransa yığması dünya çempionatları tarixində ilk dəfə öz qapısından 6 qol buraxıb. Bunadək fransızların ən pis göstəricisi 1958-ci ildə dünya çempionatında Braziliyadan buraxılan 5 qol idi.

Fransalı hücumçu Kilian Mbappe üç (2018, 2022, 2026) dünya çempionatında rəqib qapılarına ümumilikdə 22 dəfə yol taparaq turnir tarixinin ən yaxşı bombardiri ünvanına sahib çıxıb. İspaniyaya qarşı oyuna çıxacaq və ondan cəmi 1 qol geri qalan Lionel Messi isə fransalı hücumçuya çata və ya onu qabaqlaya bilər.

Digər fransalı oyunçu Maykl Olise isə cari dünya çempionatında 7 məhsuldar ötürmə edərək bir turnir ərzində ən çox assist edən futbolçu kimi yeni rekorda imza atıb. Bunadək rekord 1970-ci ildə öz aktivinə 6 qol ötürməsi yazdıran əfsanəvi futbolçu Peleyə məxsus idi.

Müqayisə üçün XXI əsrin dünya çempionatlarında qeydə alınan digər ən məhsuldar oyunlar Almaniya – Kürasao (7:1), Almaniya – Braziliya (7:1) və Almaniya – Səudiyyə Ərəbistanı (8:0) qarşılaşmaları olub.

Dünya çempionatları tarixinin ən məhsuldar görüşləri sırasına isə Avstriya – İsveçrə (7:5), Braziliya – Polşa (6:5), Macarıstan – Almaniya (8:3), Macarıstan – El Salvador (10:1) və Fransa – Paraqvay (7:3) oyunları daxildir.