"Sabah"ın kapitanı Elvin Camalovun matc.az saytına müsahibəsi

- Misli Premyer Liqasının 10-cu turunda "Zirə"yə qarşı keçirdiyiniz oyun (1:0) gözlədiyiniz məcrada keçdi?
- Bəli, oyun gözlənildiyi kimi çətin keçdi. "Zirə" çempionatın iddialı komandalarındandır. Onlarla matçın çətin alınacağı əvvəlcədən bəlli idi. İlk hissədə bir neçə qol fürsətimiz olsa da, dəyərləndirə bilmədik. Lakin ikinci hissənin ortalarında bizə lazım olan qolu vura bildik. çətin oldu. Əsas odur ki, qalib gələ bildik. Bu görüşü artıq unudub, qarşıdakı oyunlara köklənməliyik.

- Qələbə topunu yenə sona yaxın vurmağınız xarakterdən, yoxsa komandanın hücum planında gec açılmasından qaynaqlanır?
- Biz hesabı açanda matçın final fitinə təxminən 20 dəqiqə qalmışdı. Düzdür, daha erkən fərqlənə bilərdik. Şanslarımız var idi. Ancaq əldə etdiyimiz fürsətlərdən yararlana bilmədik. Daha erkən qol vura bilməməyimizə səbəb kimi rəqibin arxa xətdə yaxşı oyununu göstərərdim.

- Mövsümün əvvəlində 10 oyunda 25 xal toplayacağınız deyilsəydi, razılaşardınız?
- Məncə, yaxşı göstəricidir. Amma nəzərə almalıyıq ki, çempionatın hələ heç 1/3-ü geridə qalmayıb. Yəni, xalları saymaq üçün hələ tezdir. İndi yalnız qarşıdakı görüşlərə köklənməli və yaxaladığımız bu müsbət tempi davam etdirməliyik.

- Hələ də çempionluq hədəfi ilə bağlı sual verəndə "Sabah" düşərgəsindən konkret cavab almırıq. Buna inam azdır, yoxsa eyforiyaya qapılmaq istəmirsiniz?
- Konkret cavab ala bilməməyinizə səbəb bizim indidən çempionatın yekunu barədə planlar qurmamağımızdır. Biz həmişə növbəti oyunumuza köklənir, yalnız bu barədə düşünürük. Əlbəttə ki, əsas məqsəd hər matçdan 3 xalla ayrılmaqdır. çempionatı neçənci yerdə bitirəcəyimizi mövsümün sonunda birlikdə görəcəyik.

- Növbəti turda əsas rəqiblərinizdən olan "Neftçi" ilə keçirəcəyiniz matçı 6 xallıq mübarizə saymaq olar?
- Məncə, rəqib və görüşün əhəmiyyəti barədə xüsusi danışmağa ehtiyac yoxdur. Bizi çətin oyun gözləyir. "Neftçi" ilə matçlarımız həmişə maraqlı alınıb. İnanıram ki, azarkeşlər bu oyundan zövq alacaqlar.

- "Sabah" bu mövsüm həm oyunu, həm də uğurlu nəticələri ilə diqqət çəkir. Bunu nəyə borclusunuz?
- çox çalışmağa və öz gücümüzə olan inama. çox yaxşı, mehriban kollektivimiz var. Bununla yanaşı hər görüşə tam köklənir, 3 xal qazanmaq üçün əlimizdən gələni edirik.

- Murad Musayevin timsalında "Sabah"ın, nəhayət ki, arzuladığı baş məşqçini tapdığını demək olar?
- Murad Musayev həm yaxşı insan, həm də bacarıqlı mütəxəssisdir. Onunla çalışmaq bütün komandaya xoşdur. İnanıram ki, mövsümün sonunda hədəflərimizə birlikdə çatacağıq.

- Bu performans komandanın tam potensialının neçə faizdir?
- Məncə, bu suala baş məşqçi daha yaxşı cavab verə bilər. Sadəcə onu deyə bilərəm ki, bütün komanda daha yaxşı səviyyəyə çatmağımız və müsbət nəticələr qazanmağımız üçün əlindən gələni edir.

- Yarımmüdafiəçi olaraq Coy-Lens Mikels, Davit Volkov və Emmanuel Apeh kimi hücumçuların arxasında oynamaq işinizi asanlaşdırırmı?
- Kimisə xüsusi fərqləndirmək istəməzdim. Bayaq da dediyim kimi, yaxşı komandamız var. Bu, hücuma da, orta sahəyə də, arxa xəttə də aiddir. Klubda hamı peşəkardır, öz işini bilir və komandanın ümumi uğuru üçün əlindən gələni edir.