"Növbəti sınaq Millətlər Liqasında İspaniyaya qarşı olacaq".

Futbol üzrə İngiltərə millisinin baş məşqçisi Tomas Tuxel dünya çempionatının bürünc medal uğrunda matçında Fransaya 6:4 hesabı ilə qalib gəldikləri oyunu şərh edib.

Matc.az xəbər verir ki, bu barədə Böyük Britaniyanın BBC idman nəşri məlumat yayıb.

Bildirilir ki, ingilislərin çalışdırıcısı komandasının cavab qolunu buraxmamaq baxımından bir az bəxtinin gətirdiyini, daha sonra isə penaltini dəqiq yerinə yetirdiklərini və matçın sonunda qol vurduqlarını söyləyib.

"Oyuna daha yaxşı nəzarət etdiyimizdən əmin deyiləm. Sadəcə, meydana daha gümrah və yüksək səviyyəli oyunçular daxil oldu. Rəqib artıq yorulmuşdu. Fransa tam sürətlə oynayır və maksimum risk edirdi. Ona görə də cavab qolunu buraxmadığımız üçün bir az bəxtimiz gətirdi, daha sonra isə penalti və möhtəşəm qolla nöqtəni qoyduq", - deyə Tuxel bildirib.

Təcrübəli mütəxəssis Mayk Menyanın qapısına het-trik vuran Bukayo Sakanın möhtəşəm çıxışını da xüsusi qeyd edib.

52 yaşlı mütəxəssis Londonun "Arsenal" klubunun vingerinin oyunlardan birində xüsusilə fərqlənəcəyini hiss etdiyini və bunun milli komanda üçün çox lazımlı anda baş verdiyini vurğulayıb.

Baş məşqçinin sözlərinə görə, Bukayo növbəti dəfə yığmanın əsas oyunçularından biri olduğunu sübut edib və Tuxel buna heç vaxt şübhə etməyib. Tuxel etiraf edib ki, oyun zamanı diqqəti yayındığı üçün həmin an Sakanın 3 qol vurduğundan belə xəbəri olmayıb.

Məhz "topçular"ın üzvü bürünc medal uğrunda matçın ən yaxşı oyunçusu seçilib.

"Biz bu fərqi azaltmağa qadirik, lakin onlar da bunu yenidən artırmaq gücündədirlər. 8 il əvvəl Fransa dünya çempionu oldu. 4 il əvvəl isə finalda oynadı. Aramızda müəyyən fərq hələ də var, lakin bu, problem deyil. Biz bunu aradan qaldırmaq istəyirik.

Dünən dedim ki, bu gün bunun üçün ilk addımı atacağıq. Biz bunu etdik. Fransaya qalib gəldik. Növbəti sınaq Millətlər Liqasında İspaniyaya qarşı olacaq. Komandanın belə bir fədakarlıqla mübarizə apardığını görəndə, bu, insana enerji verir. Yorğunluq daha sonra, final baş tutanda hiss olunacaq, biz bu ağrını hələ hiss edəcəyik. Bu, dərhal keçməyəcək, lakin ümumilikdə belə matçlar mənə enerjini tükətməkdən daha çox, enerji verir", - deyə Tuxel qeyd edib.