ABŞ Prezidenti Donald Tramp FİFA rəhbəri Canni İnfantinonun Antoniu Quterreşin yerinə növbəti Birləşmiş Millətlər Təşkilatının baş katibi olmasını istəyir.

Matc.az xəbər verir ki, bu barədə ABŞ-nin "New York Post" qəzeti məlumat yayıb.

Bildirilir ki, portuqaliyalı dekabrın sonunda istefaya gedir. Amerikalı lider 56 yaşlı isveçrəli funksioneri bu vəzifəyə yaxşı namizəd hesab edir.

Onlar dünya çempionatının təşkili zamanı nəzərəçarpacaq dərəcədə yaxınlaşıblar. Bu turnirdən əvvəl Tramp tarixdə ilk FİFA Sülh Mükafatına layiq görülüb. Onun fikrincə, İnfantino insanları birləşdirmək üçün unikal qabiliyyətə malikdir və bütün dünyada böyük nüfuza sahibdir.

Bundan əlavə, Ağ Ev bu vəzifəyə hazırkı yeddi rəsmi namizədi açıq şəkildə zəif iddiaçı hesab edir. Onların arasında ABŞ-nin etirazı ilə üzləşən Çilin sabiq prezidenti Mişel Baçelet və Folklend adaları məsələsinə görə Böyük Britaniyada narahatlıq doğuran MAQATE rəhbəri Rafael Qrossi fərqlənirlər.

Trampın xüsusi elçisi olan diplomat Paolo Dzampolli artıq bu ideyanı dahi addım adlandırıb və futbol assosiasiyasının təcrübəli rəhbərinin BMT-nin uzanan bürokratiyasına qalib gəlməyə qadir olduğunu qeyd edib. Lakin hələlik liderlərin bu planı nə dərəcədə ətraflı müzakirə etdikləri və İnfantinonun öz postunu tərk etməyə hazır olub-olmadığı məlum deyil.

İsveçrəli funksioner Trampın bu təşəbbüsünü hələ şərh etməyib. O, daha əvvəl gələn ilin martında FİFA-da yeni müddətə yenidən seçilmək niyyətində olduğunu açıqlayıb.