Milli komandaların oyunları ilə bağlı yaranmış fasilədən sonra Azərbaycan Premyer Liqasında oyunlar yenidən start götürür. Çempionatda VII turun qarşılaşmaları keçiriləcək.

Matc.az xəbər verir ki, üç günü əhatə edəcək turun qarşılaşmaları oktyabrın 9-u, 10-u və 11-də baş tutacaq.

Oktyabrın 9-u turun açılış matçında "Araz-Naxçıvan" ev oyununda "Kəpəz"i qəbul edəcək. Bu komandalar indiyədək turnir çərçivəsində 15 dəfə üz-üzə gəliblər. Keçirilən oyunlarda Naxçıvan təmsilçisi 7, Gəncə klubu isə 6 qələbə qazanıb, 2 matçda isə heç-heçə qeydə alınıb. Top fərqində 20-17 hesabı ilə öndə olan "Kəpəz" son 7 matçda rəqib qapılarına yol tapa bilmədiyi halda, "Araz-Naxçıvan" son 3 qarşılaşmadan qələbə ilə ayrılıb.

Həmin günün digər maraqlı qarşılaşmasında "Neftçi" doğma divarlar arasında "Sabah"la derbi matçına çıxacaq. Paytaxt klubları indiyədək ölkə çempionatında 30 dəfə qarşılaşıblar və bu oyunların 14-də "ağ-qaralar", 9-da isə "Sabah" qələbə sevinci yaşayıb, 7 görüş isə bərabərliklə başa çatıb. Top fərqi 36-25 hesabı ilə "ağ-qaralar"ın xeyrinədir. Lakin "Neftçi" doğma meydandakı son 5 görüşündə qələbə qazana bilmədiyi halda, "Sabah" son 2 matçının hər birində fərqlənməyi bacarıb.

Oktyabrın 10-da isə turnirin ən çox qarşılaşan cütlüklərindən olan "Sumqayıt" və "Qəbələ" üz-üzə gələcək. İndiyədək keçirilən 50 oyunda böyük üstünlük 25 qələbəsi olan "Qəbələ" tərəfindədir. "Kimyaçılar" bu rəqibə qarşı cəmi 10 qələbə qazanıblar, 15 oyun isə bərabərliklə yekunlaşıb. Top fərqi də aşkar şəkildə "Qəbələ"nin xeyrinədir (71-40). Bununla belə, hazırda turnir cədvəlində fərqli dinamika var: "Sumqayıt" son 7 oyunda rəqibinə uduzmayıb, "Qəbələ" isə son 6 görüşdə qol vura bilmir.

Həmin gün reallaşacaq digər qarşılaşmada "Zirə" öz meydanında "Şamaxı" ilə qüvvəsini sınayacaq. İndiyədək baş tutan 38 görüşün 16-da "Zirə", 8-də isə "Şamaxı" qələbə qazanıb, 14 matç isə heç-heçə bitib. Top fərqi 50-35 hesabı ilə "qartallar"ın üstünlüyünü göstərir. Diqqətçəkən məqam odur ki, "Zirə" son 6 matçda rəqib qapılarına qol vura bilib, son 3 görüşdə isə hər iki komanda qarşılıqlı qollarla yadda qalıb.

Turun sonuncu günündə – oktyabrın 11-də turnir cədvəlinin iddialılarından olan "Qarabağ" səfərdə "İmişli"nin qonağı olacaq. Bu komandalar ölkə çempionatı tarixində cəmi 3 dəfə qarşılaşıblar və Ağdam təmsilçisi bu oyunların hamısında qələbə qazanaraq rəqibini 6-0 top fərqi ilə üstələyib. "İmişli" isə hələ də güclü rəqibin qapısına yol tapa bilməyib.

Nəhayət, turun son akkordlarında çempionatın iki fərqli təmsilçisi – "Şəfa" və "Turan Tovuz" qarşılaşacaqlar. Qeyd edək ki, bu iki komanda ölkə çempionatları tarixində indiyədək rəsmi matçlarda heç vaxt üz-üzə gəlməyiblər və bu oyun onlar üçün ilk tarixi sınaq olacaq.