24 May 2021, 16:11
AVRO-2020

Futbol üzrə İspaniya milli komandasının bu yay keçiriləcək Avropa çempionatı üçün ilkin heyəti açıqlanıb. Matc.az xəbər verir ki, yığmanın baş məşqçisi Luis Enrike 24 futbolçuya dəvət göndərib.
 
Maraqlıdır ki, İspaniya millisinə "Real"dan heç bir futbolçu çağırılmayıb. Halbuki, millinin kapitanı olan Serxio Ramosla yanaşı, bu komandada Dani Carvaxal, Lukas Vazkes, İsko, Naço və Alvaro Odriosolanın dəvət alanlar sırasında olması gözlənilirdi. Luis Enrikenin bu qərarından sonra İspaniya millisi tarixdə ilk dəfə "Real"ın heç bir futbolçu olmadan bir turnirdə mübarizə aparacaq. Bu mövsüm zədə səbəbindən çox oynaya bilməyən Serxio Ramos 2004-cü ildən bəri ilk dəfə millidə olmayacaq.
 
Qapıçılar: Unay Simon ("Atletik"), David de Xea ("Mançester Yunayted", İngiltərə), Robert Sançes ("Brayton", İngiltərə);
 
Müdafiəçilər: Xose Luis Qaya ("Valensiya"), Jordi Alba ("Barselona"), Pau Torres ("Vilyarreal"), Emerik Laport, Erik Qarsiya (hər ikisi "Mançester Siti", İngiltərə), Dieqo Lyorente ("Vilyarreal"), Sesar Aspilikueta ("çelsi", İngiltərə), Markos Lyorente ("Atletiko");
 
Yarımmüdafiəçilər: Serxio Buskets, Pedri (hər ikisi "Barselona"), Rodri ("Mançester Siti"), Tyaqo Alkantara ("Liverpul", İngiltərə), Koke ("Atletiko"), Fabian Ruis ("Napoli", İtaliya);
 
Hücumçular: Dani Olmo ("Leyptsiq", Almaniya), Mikel Oyarzabal ("Real Sosyedad"), Alvaro Morata ("Yuventus", İtaliya), Jerar Moreno ("Vilyarreal"), Ferran Torres ("Mançester Siti"), Adama Traore ("Vulverhempton", İngiltərə), Pablo Sarabiya (PSJ, Fransa).
 
Aç-2020 bu il iyunun 11-dən iyulun 11-dək keçirilməlidir. İspaniya millisi turnirin qrup mərhələsində İsveç, Polşa və Slovakiya yığmaları ilə qarşılaşacaq.
 
Aç-2020-yə ev sahibliyi edəcək şəhərlər arasında Bakı da var. Təqvimə əsasən, Bakı Olimpiya Stadionu A qrupunun İsveçrə – Uels, Türkiyə – Uels və Türkiyə – İsveçrə qarşılaşmalarına, eləcə də 1/4 final mərhələsinin bir oyununa ev sahibliyi edəcək.

XƏBƏRİ PAYLAŞ
  • gplus
  • pinterest