İtaliyada qeyri-qanuni idman mərc oyunları ilə bağlı araşdırma davam edir. Qumar və kazinolarda oynadıqları üçün cəzalandırıla biləcək yeni futbolçuların adları məlum olub.

Matc.az xəbər verir ki, bu barədə məlumatı "Corriere della Sera" paylaşıb.

Bildirilir ki, Milan prokurorları A Seriyasının 12 oyunçusunu 2021-2023-cü illər arasında qeyri-qanuni saytlarda mərc etdikləri və onlayn poker oynadıqları üçün araşdırır. Şübhəlilərin siyahısı futbolçuların smartfonları yoxlanıldıqdan sonra formalaşıb.

Məlum olub ki, Milanda saat mağazası bu sxemə cəlb edilib. O, futbolçuların bukmeker kontoruna borclu olduqları məbləğə görə qondarma bahalı saatlar "almaq" üçün getdikləri yerdə vasitəçi kimi çıxış edib.

Futbolçuların oynadığı qeyri-qanuni bukmeker kontorları uzun müddətdir istintaq altında olan Sandro Tonali və Nikolo Faqiolini qeyri-rəsmi olaraq reklam edirdilər.

Şübhəlilərin yenilənmiş siyahısına Ueston Makkenni ("Yuventus"), Mattia Perin ("Yuventus"), Anxel Di Mariya ("Benfika"), Leandro Paredes ("Roma"), Alessandro Florenzi ("Milan"), Nikolo Zaniolo ("Qalatasaray") və bir sıra digər futbolçular da daxildir.

Onların heç də hamısının qeyri-qanuni platformalarda idman mərcləri qoymadığı qeyd edilir. Bəziləri onlayn poker və kazino oynadıqları üçün araşdırılıb. Bu kateqoriyadan olan futbolçuların diskvalifikasiya olunma ehtimalı azdır. Qanuna görə, onlar üçün maksimum cəza 20.000 avro məbləğində cərimədir.