Rusiyanın Yekaterinburq şəhərində Beynəlxalq Universitet İdman Festivalında boks yarışlarında ikinci günün döyüşləri keçirilir. 

Matc.az xəbər verir ki, Yekaterinburq şəhərinin 300 illik yubileyinin qeyd olunmasına həsr edilən turnirdə Azərbaycan millisi artıq 2 medalı təmin edib.

Elbrus Rzayevin rəhbərlik etdiyi komandada Nicat Hüseynovun (54 kq) debütü uğurlu alınıb. Avropa çempionumuz 1/4 finalda belaruslu İvan Zaxarenkonu məğlub edib.

Şəmsi Şahbazov (71 kq) da festivala qələbə ilə başlayıb. O, tacikistanlı Abdulahad Boboyevdən güclü olub.

Hər 2 boksçumuz yarımfinala yüksəlməklə özü üçün ən azı bürünc medalı da təmin edib.

Qeyd edək ki, Beynəlxalq Universitet İdman Festivalında Azərbaycan 10 boksçu ilə təmsil olunur.