“Qarabağ” klubunun sabiq qapıçısı Fərhad Vəliyevin matc.az saytına müsahibəsi

- “Qarabağ” növbəti tarixi uğuruna imza ataraq, Avropa Liqasında pley-off mərhələsinə yüksəldi. Qrupdakı rəqiblər bilinəndə, bu nəticəyə imza atılacağını gözləyirdiniz?
- Qrupdakı rəqiblər bilinəndə, gözə batan ilk komanda "Bayer" idi. Çoxu hələ oyunlar başlamamışdan Leverkuzen klubunun qrup birincisi kimi pley-offa yüksələcəyini təxmin edirdi. Əsas sual qrupda ikinci yeri kimin tutacağı idi. Əlbəttə ki, daha çox "Qarabağ"ın adı çəkilirdi. Mən də elə düşünürdüm ki, "Qarabağ" bu qrupdan çıxa bilər. Allaha şükürlər olsun, belə də oldu. "Qarabağ" Avroliqanın pley-off mərhələsinə çıxaraq tarix yazdı.

- Səfərdə olduğu kimi, Bakıda da “Hekken” üzərində qələbə qazandıq. “Qarabağ”ın sərgilədiyi oyun haqda nə deyə bilərsiniz?
- "Qarabağ" son matç da daxil olmaqla, qrupdakı 5 oyunda gözəl futbol sərgilədi. Qrupda cəmi 1 zəif oyun keçirdilər, o da "Bayer"lə səfər qarşılaşmasına təsadüf etdi. Ümumi götürdükdə, "Qarabağ" əksər oyunlarında rəqibdən üstün futbol nümayiş etdirib.

- "Hekken"lə son matçda “Qarabağ”ın heyətində ən çox kimləri bəyəndiniz?
- Komanda şəklində yaxşı çıxış etdilər. Əsasən də müdafiə xəttini vurğulamaq istərdim. Doğrudan da, müdafiəçilər çox yaxşı çıxış etdilər, üzərilərinə düşən tapşırığı yerinə yetirə bildilər.  Meydanda 10 nəfər qaldıqdan sonra da "Qarabağ" müdafiədə etibarlı çıxış etdi. Cəmi 1 epizod istisnadır, onda da Bədavi Hüseynov istəmədən avtoqol müəllifi oldu. Ümumilikdə, "Qarabağ" "Hekken"lə matçda yaxşı çıxış etdi.

- Qapıçı Andrey Lunyov oyun ərzində bir neçə dəfə komandasını real qoldan xilas etdi. Onun çıxışını necə qiymətləndirirsiniz?
- Doğrudan da, Lunyov bu oyunu yüksək səviyyədə keçirdi, komandanı bir neçə real qoldan xilas etdi. Lunyov "Qarabağ"a transfer olunduqdan sonra etibarlı çıxış edir. Təcrübəli, yaxşı qapıçıdı. Düşünürəm ki, Lunyov təcrübəsindən istifadə edərək, "Qarabağ"da yaxşı oyun sərgiləyir. Qapıda dayananda, bu, komandaya güvən verir.

- Püşkatmada hansı komandanın “Qarabağ”a rəqib olmasını istərdiniz?
- 8 komandanın hər biri güclüdür, aralarında daha güclülər var. Avropa Liqasında zəif komanda olmur. Komandaları araşdırdığım üçün istərdim ki, püşk "Qarabağ"ın bəxtinə daha münasib rəqib çıxartsın. Çünki "Qarabağ" mərhələ adlasa, reytinqdə ölkə xalını da artıra bilər. Bu mənada, "Milan" və "Qalatasaray"dansa, "Yanq Boyz" və "Sparta" kimi komandaların rəqib düşməsi bizim üçün daha yaxşı olar.