“Neftçi”nin yarımmüdafiəçisi Emin Mahmudov ölkə kubokunun yarımfinal mərhələsində “Sabah”a 1:2 hesablı məğlubiyyətdən sonra jurnalistlərə müsahibə verib. Matc.az həmin müsahibəni təqdim edir.

- Görüş haqda nə düşünürsən?

- Oyun istədiyimiz kimi getmədi. “Sabah” əks-hücumlarda bizi yaxşı tutdu. Amma qarşıda hələ cavab oyunu var. Sona qədər mübarizə apararaq, geridönüş edəcəyik.

- Evdəki məğlubiyyətdən sonra “come back” etmək nə dərəcədə real olacaq?

- Vəziyyət asan olmayanda, oxşar matçlarımız var idi. Cəmi bir neçə il əvvəl səfərdə Kipr təmsilçisi “Aris”ə 0:2 hesabı ilə uduzduqdan sonra öz meydanımızda 3:0 hesabı ilə qalib gələrək geri dönüş etmişdik. Hər şey mümkündür. Biz bunu azarkeşlərimizə borcluyuq.

- Oyununuzda problem nədir?

- Hər şey istədiyimiz kimi alınmır. Biz tez-tez topu itiririk. Oyunumuz yaxşı getmədi. İşlərin pis getdiyini başa düşürük, amma dəyişmək lazımdır.

- Cavab oyununa özünüz tam hazır olacaqsınız?

- Zədədən sonra cəmi bir dəfə tam məşq etmişdim. Ona görə də “Sabah”a qarşı oyun çətin oldu. Ümid edirəm ki, növbəti oyuna tam hazır olacağam.

- Deməli, evdəki məğlubiyyətə baxmayaraq, finala çıxmaq ümidiniz var?

- Əlbəttə. Böyük hesabla uduzmamışıq ki, ümidimizi itirək. Vəziyyətin gedişatını dəyişməyə çalışacağıq.

- Oyundan sonra “Sabah”ın baş məşqçisi Vasili Berezutski “Neftçi”yə və hakimlərə qarşı oynadıqlarını bildirib. Nə dərəcədə haqlıdır?

- Nə dediyini bilmirəm. Hakimlər bizə kömək etmədilər.

- Bassala Sambunun yoxluğu təsir etdimi?

- Bəli. O, yaxşı oynamağa başlamışdı. Onun varlığı vacib idi. Amma onsuz da biz daha irəli getməyə çalışacağıq, başqa hücumçularımız var.