“Hypers Guba” klubunun prezidenti Ayaz Abdullayev hakimi təhqir etdiyinə görə 3 oyun şərti olmaqla 5 oyunluq cəzalanıb.

AFFA İntizam Komitəsinin iclasında II Liqanın XIX turunda baş verən neqativ hallarla da bağlı hüquqi qiymət verilib. Matc.az xəbər verir ki, bu barədə qurumun saytında məlumat yayılıb.

“Hypers Guba” – “Ağdaş” oyunu bitdikdən sonra “Hypers Guba” klubunun prezidenti Ayaz Abdullayev hakimi təhqir etdiyinə görə 3 oyun şərti olmaqla 5 oyunluq cəzalanıb, “Hypers Guba” komandası 400 manat cərimə edilib. Sınaq müddəti 3 ay təyin edilib.

Həmin görüş bitdikdən sonra “Hypers Guba” klubunun məşqçisi Rəsul Babazadə meydana daxil olaraq hakimi təhdid etdiyinə görə 2 oyun cəzalanıb, “Hypers Guba” komandası 100 manat cərimə edilib.

“Sheki City” – “Şahdağ Qusar” oyununda “Sheki City” klubunun azarkeşləri tərəfindən rəqib futbolçuların ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə ikinci dəfə yaşandığına görə “Sheki City” komandası 50 manat cərimə edilib.

Oyun bitdikdən sonra “Sheki City” klubu təhlükəsizliyi düzgün təmin etmədiyinə görə “Sheki City” komandası 400 manat cərimə edilib. “Sheki City” komandasının növbəti ev oyunu azarkeşsiz keçiriləcək.