Joze Mourinyo yenidən gündəmə gəlib. Matc.az xəbər verir ki, bu dəfə diqqət mərkəzində “Fənərbaxça”nın portuqaliyalı baş məşqçisinin Türkiyə kubokunun “Qalatasaray”a (1:2) qarşı keçirilən yarımfinal oyunundan sonrakı davranışı olub.

Mourinyo rəqibin çalışdırıcısı Okan Burukun burundan tutub, həmkarı isə özünü yerə atıb. Qırmızı vərəqə alan portuqaliyalı mətbuat konfransına qatılmayıb. Mourinyo bu ilin fevralında “Qalatasaray”la çempionat matçından (0:0) sonra rəqib futbolçuların meymun kimi tullandığını demişdi. Həmin vaxt o, irqçi ifadəyə və dördüncü hakimə təhqirə görə 4 oyunluq cəzalandırılmışdı.

Onu növbəti cəza gözləyir. Əgər hərəkəti “qeyri-idman davranışı” kimi qiymətləndirilsə, 1-3 oyun arası cəza ala bilər. Daha ağır sanksiya isə 5-10 oyunluq ola bilər Təbii ki, bu hərəkət “rəqibə hücum” kimi dəyərləndirilsə.

Okan Buruk matçdan sonra hadisənin şişirdilməməsini istəyib: “Kaş oyundan sonra məşqçilər sadəcə bir-birilərinə əl verib ayrılsaydılar. Amma belə olmadı. Biz hakimlərin yanına getdik və sonra hər kəs hər şeyi gördü. Mourinyonun davranışını doğru hesab etmirəm. Amma burnumda sadəcə kiçik bir cızıq var. Bu barədə çox danışmaq istəmirəm. Hadisəni şişirtməyə ehtiyac yoxdu”.

Türkiyə futbol ictimaiyyəti də Mourinyoya qarşı çıxıb. Onların bir neçəsinin açıqlamasını təqdim edirik:

Şərhçi Sərdar Ali Çəliklər: “Mourinyonun “Fənərbaxça”dakı vaxtı bitib. Onu qovmaq lazımdı. Nəyə ümid edirdi? Rəqib məşqçiyə hücum etdi. Rədd olsun! Ona kompensasiya verin və yola salın. “Fənərbaxça” Okan Burukdan üzr istəməlidi. Normal şəraitdə “Qalatasaray” 6:1 və ya 7:1 qazana bilərdi. Belə bir gərgin oyundan sonra “Fənərbaxça” sükut içindədi. Bu, heç də yaxşı əlamət deyil. Gözləyirəm ki, rəhbərlik Mourinyonu və ya hansısa meneceri istefaya göndərəcək. Mourinyo bu mövsümdə uğursuzdu. Okan Buruk onu tam məğlub etdi”.

“Qalatasaray”ın İdarə Heyətinin sabiq üzvü Əşrəf Hamamcıoğlu: “Mourinyonu təcili psixoloji terapiyaya göndərmək və sonra deportasiya etmək lazımdı. İlk addımı “Fənərbaxça” özü atmalıdı”.

“Qalatasaray”ın vitse-prezidenti Mətin Öztürk: “Bu, təkcə “Qalatasaray”ın məşqçisinə deyil, bütün Türkiyə futboluna hücumdu. Mourinyonun belə cəsarəti hardan gəlir? Türkiyə Futbol Federasiyası hər şeyi gördü. O, əvvəlcə sözlə, sonra isə əməldə Okan Buruka hücum etdi. Dünyanın başqa bir yerində bu cür hərəkət etsəydi, nə baş verərdi? Onun Türkiyə haqqındakı fikirləri nələrdi? Cəzasız qalmamalıdı”.

Tanınmış şərhçi Ahmet Çakar: “Mourinyo bu hərəkəti ilə özünə son qoydu. O, “Qalatasaray” futbolçularını meymun adlandırdı, indi isə rəqib məşqçini burnundan tutdu. Əgər “Fənərbaxça”da qalsa, bu, bizim üçün biabırçılıq olar. Mourinyo artıq sadəcə ağlağan biri deyil, o, arxadan hücum edən biridi”.

Keçmiş futbolçu Sinan Engin: “Nə “Fənərbaxça” rəhbərliyi, nə Mourinyo, nə də futbolçular bu məğlubiyyəti hakimə yıxmalıdı. “Qalatasaray” layiqli qələbə qazandı. Mourinyo məşqçi kimi artıq bitib. Bunu onun davranışları sübut edir. Okan Burukun yerində olsaydım, cavabını verərdim”.

Sabiq futbolçu və məşqçi Öndər Özən: “Bu oyun göstərdi ki, “Fənərbaxça” bitib. “Qalatasaray” 3-4 fərqlə qalib gəlməli idi. Əlimdə səlahiyyət olsaydı, “Fənərbaxça”nın məşqçi heyətinə maaş ödəməzdim. Mourinyo Okanla görüşə belə, layiq deyil. “Qalatasaray” uğursuzluğa düşəndə dərhal məşqçi və rəhbərliyi dəyişir. Amma “Fənərbaxça” 7 ildi eyni yerdə sayır”.

Sabiq futbolçu və hazırda ekspert olan Abdülkərim Durmaz: “Adətən kişi başqa kişiyə hücum etmir, ta ki, ona nəsə deməyənə qədər. Yəqin ki, Okan Mourinyoya nəsə deyib. Amma Mourinyonun davranışı böyük səhv idi. Görünür, eşitdiyi şeyi qəbul edə bilmədi. Oyunda minlərlə səhv etdi. Mən azarkeşlərdən ibarət 11 nəfəri meydana buraxsaydım, ilk hissədə daha yaxşı oynayardılar”.

Sabiq futbolçu Ərman Toroğlu: “Mourinyo artıq zərbələri qəbul edə bilmir. O, Türkiyədə istədiyi hər şeyi edə biləcəyini düşünür. Amma artıq getməlidi. Onun gücü yalnız Okan Buruku burnundan tutmağa çatdı. Amma komandası heç nə oynaya bilmədi”.