Sabah Misli Premyer Liqasında XXIX tura start veriləcək. Matc.az xəbər verir ki, turun görüşləri 3 günü əhatə edəcək.

İlk gündə bir oyun olacaq. Açılış matçında Autsayder “Səbail” dördüncü pillədə qərarlaşan “Turan Tovuz”u qəbul edəcək. Qəsəbə təmsilçisi son pillədən qurtulmaq şansını davam etdirmək üçün mütləq qalib gəlməlidi. Tovuzlular isə 3-cü sıradakı komandadan uzaq düşməmək üçün aktivinə 3 xal yazdırmalıdı.

Premyer Liqanı tərk etmək təhlükəsi hələ də davam edən “Kəpəz” ilk “dördlüy”ə iddiasını davam etdirən “Sabah”ın qonağı olacaq. Bu matçın favoriti bakılılar olsa da, komandanın qeyri-stabil çıxışı Gəncə təmsilçisini ümidləndirən məqamdı.

Turun mərkəzi oyununda lider “Qarabağ” ən yaxın izləyicisi “Zirə”ni qəbul edəcək. Hazırda rəqibindən 12 xal öndə olan ağdamlılar fərqi daha da artırmağı planlaşdırır. Ancaq görüş “Zirə” üçün daha böyük önəm kəsib edir. Çünki Rəşad Sadıqovun yetirmələri izləyicilərinin ona yaxınlaşmasına mane olmaq üçün qalib gəlməlidi.

Uğursuz mövsüm keçirən və turnir cədvəlinin ikinci hissəsində qərarlaşan “Şamaxı” ilə “Neftçi” birincilərin meydanında qarşılaşacaq. “Neftçi”nin Premyer Liqadan heç bir iddiası qalmadığından, komanda bütün diqqətini ölkə kubokuna yönəldib.

Mövsümün sürpriz komandası “Araz-Naxçıvan” isə turun son matçında “Sumqayıt”ı sınağa çəkəcək. “Zirə”nin “Qarabağ”la qarşılaşacağını nəzərə alsaq, naxçıvanlılar qələbə təqdirində ikinci pillədəki rəqibinə bir qədər də yaxınlaşa bilər.

Misli Premyer Liqası
XXIX tur
5 aprel

17:00. “Səbail” – “Turan Tovuz”
“ASCO Arena”

6 aprel
17:00. “Sabah” – “Kəpəz”
“Bank Respublika Arena”

19:30. “Qarabağ” – “Zirə”
Tofiq Bəhramov adına Respublika Stadionu

7 aprel
15:30. “Şamaxı” – “Neftçi”
Şamaxı şəhər stadionu

18:00. “Araz-Naxçıvan” – “Sumqayıt”
“Liv Bona Dea Arena”