Bu gün AFFA-nın Apellyasiya Arbitraj Tribunalının iclası keçirilib. Matc.az xəbər verir ki, bu barədə məlumat AFFA-nın mətbuat xidməti tərəfindən yayılıb.

Toplantıda bir çox məsələlər müzakirə olunub:

“Səbail” komandasının futbolçusu Süleyman Alluş barəsində verilən qərardan şikayətə baxılıb. “Səbail” Peşəkar Futbol Klubu tərəfindən verilən apellyasiya şikayəti təmin edilməyib.

Nəticədə 9 mart 2025-ci il tarixdə Misli Premyer Liqasında XXVI tur çərçivəsində keçirilən “Zirə” - “Səbail” oyununun 74-cü dəqiqəsində “Səbail”in futbolçusu Süleyman Alluş təcavüzkar davranışa görə birbaşa qırmızı vərəqə aldıqdan sonra hakimləri təhqir etdiyi üçün futbolçunun 4 oyun cəzalanması və klubun isə 3000 AZN məbləğində cərimə olunması (qüvvədə olan AFFA İntizam Məcəlləsinin 40.3-cü maddəsi) barədə AFFA İntizam Komitəsinin 13 mart 2025-ci il tarixli qərarı qüvvədə saxlanılıb.

“Neftçi-2” komandasının futbolçusu Həbib İsmayılov barəsində verilən qərardan şikayətə baxılıb. “Neftçi” Peşəkar Futbol Klubu tərəfindən verilən apellyasiya şikayəti təmin edilməyib.

Nəticədə 11 mart 2025-ci il tarixdə Əvəzedicilər Liqasında XXVI tur çərçivəsində keçirilən “Neftçi-2” – “Turan Tovuz-2” oyununun 90+5-ci dəqiqəsində “Neftçi-2” komandasının futbolçusu Həbib İsmayılov təcavüzkar davranışa görə birbaşa qırmızı vərəqə aldığı üçün futbolçunun 4 oyun cəzalanması və klubun isə 300 AZN məbləğində cərimə olunması (qüvvədə olan AFFA İntizam Məcəlləsinin 40.3-cü maddəsi) barədə AFFA İntizam Komitəsinin 13 mart 2025-ci il tarixli qərarı qüvvədə saxlanılıb.

I Liqada çıxış edən “Mingəçevir” klubunun sabiq futbolçusu Nəzərli Muxtar Mehman oğlunun danışılmış oyunlarda iştiraka görə ömürlük müddətdə futbol ilə əlaqədar hər hansı fəaliyyətlə məşğul olmaq hüququndan məhrum edilməsi (maddə 107.2) barədə AFFA İntizam Komitəsinin 30 yanvar 2025-ci il tarixli qərarından futbolçu tərəfindən verilən apellyasiya şikayətinə baxılması Azərbaycan Respublikasının Baş Prokurorluğuna sorğu göndərilməsi ilə əlaqədar olaraq təxirə salınıb.